Жамоат жойида ярим яланғоч юрган эркак қамалди

Кеча, 1 апрель куни ижтимоий тармоқларда номаълум фуқаро Тошкент шаҳар Чилонзор туманида жамиятда юриш-туриш қоидаларини бузиб, ярим яланғоч юргани акс этган видео тарқалди ва турли муҳокамаларга сабаб бўлди. Ушбу ҳуқуқбузарликни содир этган фуқаро 10 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, жорий йилнинг 22 март куни 1998 йилда туғилган Ш.О. Тошкент шаҳар Чилонзор туманида жойлашган “Magic City” кўнгилочар масканида ярим яланғоч ҳолда видеолавҳа олиб, оммани ўзига жалб этган. Шунингдек, у фуқаролар орасида ҳар хил ҳаракатлар қилиб, жамоат тартибини бузган ва майда безорилик содир этган. Бундан ташқари, Ш.О. ИИО ходимларинг қонуний талабларини бажармасдан ҳуқуқбузарликни давом эттирган.

Кеча, 1 апрель куни Жиноят ишлари бўйича Чилонзор туман судида мазкур иш кўриб чиқилган. Суд мажлисида Ш.О. айбига иқрор бўлиб, қилган ишларида маъмурий ҳуқуқбузарлик аломатлари мавжуд эмаслигини, бундай оғир оқибатларга олиб келишини билмаганини, қилмишидан пушаймонда эканлигини айтган ва ўзига нисбатан енгиллик беришни сўраган.

Ш.О. Маъмурий жавобгарлик тўғрисидаги кодекснинг 183-моддаси (Майда безорилик) ва 194-моддаси (Ички ишлар органлари ходимининг қонуний талабларини бажармаслик) 1-қисмида назарда тутилган маъмурий ҳуқуқбузарликни содир этган деб топилган.

Эслатиб ўтамиз, аввалроқ Тошкент шаҳрида алкоголли ичимлик истеъмол қилиб, жамоат тартибини бузган эркак 10 суткага қамалганди.