Жанубий Кореяда икки кундан буён йирик ўрмон ёнғини кузатилмоқда

Жанубий Корея пойтахти Сеулдан 280 километр жануби-шарқда жойлашган Мирянг туманида икки кундан буён катта ёнғин кузатилмоқда. Бу ҳақда бугун, 24 февраль куни “Yonhap” хабар берди.

Маълум қилинишича, ёнғин тоғ ёнбағрида бошланган. Ўрмон хўжалиги расмийлари ёнғин тахминан 6 километргача чўзилганини, унинг қарийб ярми назорат остига олинганини билдирган.

Хавфсизлик чораси сифатида 184 нафар аҳоли эвакуация қилинган. Қуруқ об-ҳаво ёнғиннинг тез тарқалишига сабаб бўлаётгани таъкидланмоқда. 

Вазият жиддийлиги сабабли “2-даражали ўрмон ёнғинларига жавоб бериш буйруғи” эълон қилинган. Бу тартиб одатда 48 соатдан ортиқ давом этиши мумкин бўлган йирик ёнғинларга нисбатан қўлланилади.

Хабарларга кўра, ёнғинни бартараф этиш учун 600 дан ортиқ ходим ва 160 та ўт ўчириш техникаси сафарбар этилган.

Эслатиб ўтамиз, аввалроқ 2025 йилда Европа Иттифоқи ҳудудида 1 миллион гектардан ортиқ ўрмонлар ёниб кетгани ҳақида хабар берилган эди.