Ҳабиб қачон ММА’даги фаолиятини бутунлай якунлашини айтди

Собиқ UFC чемпиони Ҳабиб Нурмагомедов Ҳалил билан суҳбатда аралаш яккакурашлар (ММА) билан боғлиқ фаолиятини қачон тўлиқ якунлашини маълум қилди. Шон-шуҳрат залига киритилган собиқ жангчи профессионал жангларни якунлаган бўлса-да, ҳозирда топ жангчиларни тайёрлаш билан шуғулланмоқда.

Жангни тарк этганига қарамай, Ҳабибнинг ҳаёти ҳали ҳам ММА билан чамбарчас боғлиқ. У мураббийлик фаолияти спортчиликдан ҳам мураккаброқ эканини тан олиб, ҳозирда фаолиятининг энг қийин босқичини бошдан кечираётганини таъкидлади:

“Ахир, мен бутун умримни қафасда ўтказдим. Энди эса мен доимо ундан ташқаридаман. Менга бу ҳолат ёқмайди, чунки укаларим қафасда нима қилаётганини томоша қилиш, уларга фақат маслаҳат бера олиш – бу жуда оғир. Улар учун ўзим жанг қилгандек ҳис қиламан”, деди Нурмагомедов.

Ҳабибнинг сўзларига кўра, у Ислом Махачев, Усмон Нурмагомедов ва Умар Нурмагомедов ўз жанговар фаолиятларини якунлагач, мураббийликдан ҳам кетишни режалаштирмоқда.
У 2020 йил октябрь ойида UFC 254 турнирида Жастин Гейджи мағлуб этгач, фаолиятини якунлаганини эълон қилган эди. Шунингдек, у чемпион сифатида Дастин Порье ва Конор Макгрегорни ҳам мағлуб этган.

Маълумот учун, Нурмагомедов ҳозирги кунда мураббий сифатида фаолиятини давом эттириб, UFC ҳамда PFL жангчиларини, жумладан Усмон Нурмагомедовни тайёрламоқда.

Эслатиб ўтамиз, аввалроқ UFС’нинг собиқ мутлақ чемпиони, аралаш жанг санъати юлдузи Ҳабиб Нурмуҳамедов Ўзбекистон Аралаш жанг санъати ассоциацияси таклифига биноан Тошкентга келган эди.