“Ҳаммасини у айтди”. Трамп Эронга қарши уруш унинг ғояси эмаслигини билдирди (видео)

АҚШ Президенти Дональд Трамп Эрон билан уруш ташаббуси ўзидан чиқмаганини айтиб, асосий таклиф муаллифи сифатида АҚШ Мудофаа вазири Пит Ҳегсетни тилга олди. Бу ҳақда у кеча, 23 март куни журналистлар билан учрашувда сўз очди.

Трампнинг сўзларига кўра, айнан Ҳегсет биринчи бўлиб “келинг, буни қиламиз” деб Эронни бомбардимон қилиш ғоясини илгари сурган.

Ўша пайтда унинг ёнида ўтирган Ҳегсетнинг юз ифодасидан у бу баёнотдан мамнун эмаслиги сезилгани кўринади. Эҳтимол у очиқчасига айбдор қилиб кўрсатилаётганидан хавотирланган ёки ҳақиқатан ҳам бу қарор оқибатлари учун жавоб беришига тўғри келишини тушунган.

Ҳарбий блогерлар ҳам бу вазиятга муносабат билдириб, Трамп муваффақиятсизлик учун айнан Ҳегсетни айблаши мумкинлигини аввалдан тахмин қилишганини ёзмоқда.

Эслатиб ўтамиз, аввалроқ Трамп икки кунлик жуда яхши ва самарали музокаралар бўлиб ўтганини айтиб, Эрон энергетика объектларига зарбаларни 5 кунга тўхтатишни буюрганини билдирган эди. Унинг сўзларига кўра, томонлар Яқин Шарқдаги ҳарбий ҳаракатларни тартибга солиш масаласини муҳокама қилган.

22 март куни Трамп Эрон 48 соат ичида Ҳормуз бўғозини очмаса, мамлакатдаги электр станцияларини йўқ қилиш билан таҳдид қилган эди. Теҳрон эса бунга жавобан АҚШнинг Яқин Шарқдаги барча энергетика ва ахборот инфратузилма объектларига зарба беришини билдирган.