“Аҳвол ниҳоятда ачинарли”. Саида Мирзиёева Бухородаги боғча ва поликлиникани кўздан кечирди

Бугун, 15 май куни Ўзбекистон Президенти Администрацияси раҳбари Саида Мирзиёева Бухородаги нураб ётган боғча ва поликлиникаларни кўздан кечирди. Бу ҳақда у ўзининг Telegram-каналида ёзиб қолдирди.

Мирзиёеванинг сўзларига кўра, абгор аҳволга келиб қолган ушбу муассасаларни зудлик билан таъмирлаш керак.

“Ҳудудларга сафарларимиз – Президент топшириқлари ижросининг қатъий назорати ва жойлардаги ҳар бир муаммога қаратилган эътибордир. Биз Бухорода кўздан кечирган боғча ва поликлиникаларнинг аҳволи ниҳоятда ачинарли, уларни зудлик билан таъмирлаш талаб этилади. Бу болаларимизнинг келажаги учун зарур”, деган Администрация раҳбари.

Унинг қўшимча қилишича, болалар боғчаси ҳамда поликлиниканинг қурилганига салкам ярим аср бўлган ва улар ҳозирда ҳеч қандай стандартларга жавоб бермайди.

“1977 йилда очилган 21-сонли болалар боғчаси қайтадан қурилади, 46 минг нафар одамга хизмат кўрсатадиган 9-сонли поликлиника учун эса янги бино барпо этилади. Ҳозирда мазкур муассаса 1972 йилда қурилган, тиббий стандартларга жавоб бермайдиган бинода – кам таъминланган фуқаролар учун мўлжалланган ётоқхонада жойлашган. Ушбу бино ҳам тўлиқ таъмирланади ва у ерда яшовчиларнинг шароитлари яхшиланади”, дейилади хабарда.

Бундан ташқари, икки йил ичида вилоятнинг чекка туманларида жойлашган яна 36 та поликлиникани реконструкция қилиш кўзда тутилган.

Эслатиб ўтамиз, кеча, 14 май куни Ўзбекистон Президенти Администрацияси раҳбари Саида Мирзиёева Бухородаги Осиё хотин-қизлари иккинчи форумида қатнашиб, Президент мурожаатини ўқиб эшиттирганди.