АҚШ Куба Президентининг истеъфосини талаб қилмоқда – NYT

АҚШ Президенти Дональд Трамп маъмурияти Куба Президенти Мигель Диас-Канелни ҳокимиятдан четлатишга уринмоқда. Бу ҳақда тўртта манбага таяниб, “The New York Times” хабар берди.  

Қайд этилишича, музокаралар давомида Америка томони Куба Президенти кетиши кераклигини тушунтирган, бироқ кейинги қадамларни кубаликларнинг ихтиёрига қолдирган. Трамп маъмурияти мулозимларига кўра, Диас-Канелнинг кетиши Кубада Вашингтон кутаётган таркибий иқтисодий ислоҳотларни амалга оширишга имкон беради, чунки амалдаги Президент буни қўллаб-қувватлаши даргумон.

NYT суҳбатдошларидан бирининг айтишича, Вашингтон, шунингдек, ҳали ҳам Фидель Кастро ғояларига содиқ қолган баъзи кекса амалдорларнинг ҳокимиятдан четлатилишини хоҳламоқда. Шу билан бирга, АҚШ ҳозирча мамлакатда катта таъсирга эга бўлган Кастро оиласи аъзоларига қарши кескин чоралар талаб қилмаяпти.

Газета манбасига кўра, Куба Президентининг алмаштирилиши Дональд Трамп учун “рамзий ғалаба” бўлади ва унга худди Венесуэладаги каби АҚШга узоқ вақт қарши чиққан чап қанот ҳукумати етакчисини ағдарганини эълон қилиш имконини беради. 

“Америка расмийлари назарида музокаралар Кубани ўз иқтисодиётини Америка бизнеси ва компаниялари учун босқичма-босқич очишига, қарам давлат яратишга замин ҳозирлашга ҳамда Трамп эълон қилиши мумкин бўлган бир нечта рамзий сиёсий ғалабаларга эришишга қаратилган”, дейилади мақолада.

65 ёшли Мигель Диас-Канель 2018 йилдан бери Куба Президенти лавозимини эгаллаб келмоқда. “The New York Times” уни давлатнинг номинал раҳбари деб атайди. Уни ўз вориси сифатида собиқ президент, ҳозирда 94 ёшда бўлган ва ҳали ҳам мамлакатда катта таъсирга эга Рауль Кастро танлаган эди.

Эслатиб ўтамиз, аввалроқ Дональд Трамп АҚШ Кубани “дўстона эгаллаб олиши” (friendly takeover) мумкинлигини айтган ва Куба ҳукумати “тез орада қулашини” тахмин қилган эди. “The Wall Street Journal” маълумотларига кўра, Трамп маъмурияти 2026 йил охиригача ҳокимиятни алмаштириш учун Куба ҳукуматидан ўз одамларини (агентларини) қидирган.

Мигель Диас-Канель 13 март куни Куба вакиллари АҚШ расмийлари билан музокараларни бошлаганини эълон қилди. Унинг сўзларига кўра, мулоқот орқали “икки давлат ўртасида мавжуд бўлган келишмовчиликларнинг эҳтимолий ечимини” топиш кўзланган.

Кеча, 16 март куни Кубада тўлиқ блэкаут (электр таъминотининг бутунлай узилиши) содир бўлган. Диас-Канель аввалроқ мамлакат уч ойдан ортиқ вақт давомида нефть олмаганини, қуёш энергияси, табиий газ ва иссиқлик электр станциялари ҳисобига ишлаётганини айтган эди. Илгари Куба нефтни Венесуэладан олган, бироқ АҚШ Венесуэла етакчиси Николас Мадурони қўлга олгач (асирга олгач), етказиб бериш тўхтаган.