АҚШ Кубага нисбатан денгиз блокадасини жорий этиши мумкин

АҚШ Президенти Дональд Трамп маъмурияти Кубага нефть етказиб беришни тўхтатиш мақсадида ҳарбий-денгиз блокадаси жорий этиш имкониятини муҳокама қилмоқда. Бу ҳақда “Politico” хабар берди.

Нашрга кўра, якуний қарор ҳозирча қабул қилинмаган. Чунки маъмурият ичида бу чорани қўллаб-қувватловчилар ҳам, унга қарши бўлганлар ҳам бор.

Блокада ғоясини АҚШ Давлат котиби Марко Рубио қўллаб-қувватламоқда, бироқ айрим мансабдорлар нефть етказиб беришнинг тўлиқ тўхтатилиши оролда гуманитар инқирозга олиб келиши мумкинлигидан хавотир билдирмоқда. Венесуэладан етказиб бериладиган нефтнинг тўхташи аллақачон Куба иқтисодиётига салбий таъсир кўрсатган.

“Politico”нинг қайд этишича, блокада Куба коммунистик ҳукуматига босим ўтказиш воситаларидан бири сифатида кўриб чиқилмоқда. Бунгача Дональд Трамп Гавананинг энди Каракасдан на нефть, на молиявий ёрдам олмаслигини айтган ва Куба расмийларини Вашингтон билан келишувга боришга чақирган.