АҚШ Ларижонийни ва яна 10 кишига санкциялар рўйхатига киритди

АҚШ Молия вазирлиги 11 нафар Эрон фуқароси, жумладан, Миллий хавфсизлик олий кенгаши котиби Али Ларижоний ҳамда Эрон, БАА ва Сингапурда рўйхатдан ўтган 13 та ташкилот, жумладан, газ ва нефть компанияларига қарши санкциялар жорий этилганини эълон қилди. 

Санкциялар рўйхатида Ларижонийдан ташқари, АҚШ норозилик намойишларини шафқатсизларча бостиришда айблаган Ислом инқилоби қўриқчилари корпуси ходимлари ва полициячилар ҳам бор. 

Молия вазирлиги эълон қилган ҳужжатда таъкидланишича, санкция чоралари фаолияти “яширин банк иши” билан боғлиқ бўлган юридик шахсларга ҳам қаратилган.

Шунингдек, санкциялар рўйхатида Фардис қамоқхонаси ҳам келтирилган. 

14 январь куни АҚШ Президенти Доналд Трамп оммавий норозилик намойишлари бостирилиши сабабли Америка маъмурияти Эронга қандай таъсир чоралари кўрсатишини аниқ билишини айтди. Шу билан бирга, у АҚШ Теҳронга ҳарбий ёки бошқа усуллар билан таъсир ўтказишни режалаштираётганини айтмади. Бир неча кун олдин Америка раҳбари агар Эрон Яқин Шарқдаги Америка объектларига ҳужум қилса, Эронга кучли зарба бериш имкониятини тан олди. 

G7 давлатлари 14 январь куни расмийлар норозилик намойишларини бостиришда давом этса, Эронга қарши янги чоралар кўришга тайёрлиги ҳақида баёнот берди. 

“Ҳалок бўлганлар ва жароҳатланганлар сони кўплиги ҳақидаги хабарлар бизни қаттиқ хавотирга солмоқда. Биз намойишчиларни қасддан зўравонлик ва ўлдириш, ўзбошимчалик билан ҳибсга олиш, шунингдек, хавфсизлик кучларининг намойишчиларга нисбатан қўрқитиш тактикасини қоралаймиз”, дейилади Франция Ташқи ишлар вазирлиги сайтида эълон қилинган G7 баёнотида. 

Теҳронда норозилик намойишлари 2025 йил охиридан бери давом этмоқда. 29 декабрь куни риал курсининг кескин тушиши сабабли дўкон эгалари кўчага чиқди, эртаси куни уларга талабалар ҳам қўшилди. Кейинчалик тартибсизликлар Эроннинг барча вилоятларини қамраб олди. 2026 йил 2 январь куни кўчаларда қуролли гуруҳлар пайдо бўлди, ҳуқуқ-тартибот идоралари ходимлари билан тўқнашувлар кучайди, норозилик намойишларининг энг юқори чўққиси 8 январга тўғри келди. Эрон расмийлари босқинчиларни террорчилар деб атаб, Исроил ва АҚШни тартибсизликларни уюштирганликда айблади.