AQSH Larijoniyni va yana 10 kishiga sanksiyalar ro‘yxatiga kiritdi

AQSH Moliya vazirligi 11 nafar Eron fuqarosi, jumladan, Milliy xavfsizlik oliy kengashi kotibi Ali Larijoniy hamda Eron, BAA va Singapurda ro‘yxatdan o‘tgan 13 ta tashkilot, jumladan, gaz va neft kompaniyalariga qarshi sanksiyalar joriy etilganini e’lon qildi. 

Sanksiyalar ro‘yxatida Larijoniydan tashqari, AQSH norozilik namoyishlarini shafqatsizlarcha bostirishda ayblagan Islom inqilobi qo‘riqchilari korpusi xodimlari va politsiyachilar ham bor. 

Moliya vazirligi e’lon qilgan hujjatda ta’kidlanishicha, sanksiya choralari faoliyati “yashirin bank ishi” bilan bog‘liq bo‘lgan yuridik shaxslarga ham qaratilgan.

Shuningdek, sanksiyalar ro‘yxatida Fardis qamoqxonasi ham keltirilgan. 

14 yanvar kuni AQSH Prezidenti Donald Tramp ommaviy norozilik namoyishlari bostirilishi sababli Amerika ma’muriyati Eronga qanday ta’sir choralari ko‘rsatishini aniq bilishini aytdi. Shu bilan birga, u AQSH Tehronga harbiy yoki boshqa usullar bilan ta’sir o‘tkazishni rejalashtirayotganini aytmadi. Bir necha kun oldin Amerika rahbari agar Eron Yaqin Sharqdagi Amerika ob’ektlariga hujum qilsa, Eronga kuchli zarba berish imkoniyatini tan oldi. 

G7 davlatlari 14 yanvar kuni rasmiylar norozilik namoyishlarini bostirishda davom etsa, Eronga qarshi yangi choralar ko‘rishga tayyorligi haqida bayonot berdi. 

“Halok bo‘lganlar va jarohatlanganlar soni ko‘pligi haqidagi xabarlar bizni qattiq xavotirga solmoqda. Biz namoyishchilarni qasddan zo‘ravonlik va o‘ldirish, o‘zboshimchalik bilan hibsga olish, shuningdek, xavfsizlik kuchlarining namoyishchilarga nisbatan qo‘rqitish taktikasini qoralaymiz”, deyiladi Fransiya Tashqi ishlar vazirligi saytida e’lon qilingan G7 bayonotida. 

Tehronda norozilik namoyishlari 2025 yil oxiridan beri davom etmoqda. 29 dekabr kuni rial kursining keskin tushishi sababli do‘kon egalari ko‘chaga chiqdi, ertasi kuni ularga talabalar ham qo‘shildi. Keyinchalik tartibsizliklar Eronning barcha viloyatlarini qamrab oldi. 2026 yil 2 yanvar kuni ko‘chalarda qurolli guruhlar paydo bo‘ldi, huquq-tartibot idoralari xodimlari bilan to‘qnashuvlar kuchaydi, norozilik namoyishlarining eng yuqori cho‘qqisi 8 yanvarga to‘g‘ri keldi. Eron rasmiylari bosqinchilarni terrorchilar deb atab, Isroil va AQSHni tartibsizliklarni uyushtirganlikda aybladi.