АҚШ Россияга “ҳалокатли” санкциялар тайёрлади

АҚШнинг Россияга қарши киритилиши режалаштирилган янги ва “ҳалокатли” санкциялари мамлакатни ўзининг асосий савдо ҳамкорларидан ажратиб қўйиши мумкин. Бу ҳақда “Politico” хабар берди.

Жанубий Каролинадан сайланган республикачи сенатор Линдси Грэм Россия иқтисодиётига кучли зарба берадиган санкциялар лойиҳасини Демократлар партиясидан бўлган сенатор Ричард Блументал билан бирга тайёрлаган. Бу лойиҳа Москвага Украина билан тинчлик музокараларидан бош тортган тақдирда, Россия билан савдо қилаётган давлатлардан импорт қилинадиган маҳсулотларга 500 фоизлик бож жорий этишни кўзда тутади. Гап асосан Россия нефти, урани, газ, нефть маҳсулотлари ва бошқа хомашё турлари ҳақида кетмоқда.

Нашрнинг ёзишича, бундай бож жорий этилиши АҚШни йирик жаҳон иқтисодиётларидан, жумладан Европадаги иттифоқчиларидан ҳам узиб қўйиши мумкин. 

Жорий ҳафтада Грэм агар бирор давлат Украинага ҳарбий ёрдам кўрсатса, уни санкция хавфидан озод қилишни таклиф қилган. Бу ҳолатда Европа Иттифоқи (ҳозирда у ўз импортининг қарийб 20 фоизини Россия газидан олади) 500 фоизлик бождан мустасно қилинади. Бироқ мутахассислар сенаторнинг ташаббусига шубҳа билан қарамоқда.

Россиянинг энергия ресурслари экспортининг қарийб 70 фоизи Ҳиндистон ва Хитойга тўғри келади. Бож ставкалари бу давлатларга ҳам тааллуқли бўлиши мумкин. Бундан ташқари, Россиядан нефть, газ ёки уран харид қилаётган яна бир қанча бошқа давлатлар ҳам бу санкцияларга дуч келади. Айниқса, Хитой маҳсулотларига 500 фоизлик бож жорий этилиши АҚШда нархларнинг кескин ошишига, таъминот занжирларининг узилишига, ишсизликнинг кўпайишига ва Хитой билан савдонинг тўхташига олиб келиши мумкин. 

Шунга қарамай, лойиҳа Сенатда кенг икки партиявий қўллаб-қувватлашга эга бўлиб, 82 нафар қонунчи имзо қўйган. Бироқ айримлар бу қонун лойиҳасини танқид қилмоқда. Масалан, Кентуккидан сайланган сенатор Пол Рэнд уни “яхши ўйлаб чиқилмаган қонун лойиҳаси” деб атаган. 

Сенатдаги республикачилар етакчиси Жон Тюн Сенат ушбу қонун лойиҳасини жорий йилнинг июнь ойи охирида кўриб чиқиши мумкинлигини айтган. Республика партиясининг сенаторлари бу масалада Оқ уйнинг розилигини олишни истамоқда. Россия ҳукумати эса Ғарб санкцияларини ноқонуний деб ҳисоблайди ва уларни бекор қилишни талаб қилмоқда.

Эслатиб ўтамиз, аввалроқ АҚШ Президенти Дональд Трампнинг Украина бўйича махсус вакили Кит Келлогг “Fox News” телеканалига берган интервьюсида Россияга қарши янги санкциялар пакети аллақачон тайёрланганини маълум қилганди.