АҚШ суди Трампнинг $1,8 миллиардлик жамғармасини тўхтатиб қўйди

АҚШ федерал суди Президент Дональд Трамп маъмуриятининг ҳукумат томонидан амалга оширилган “сиёсий таъқиблар” қурбонларига товон тўлаш учун ташкил этилаётган қарийб 1,8 миллиард долларлик жамғарма фаолиятини вақтинча тўхтатди. Бу ҳақда бугун, 30 май куни “Reuters” ахборот агентлиги хабар берди.

Виржиния штати Шарқий округи судьяси Леони Бринкема чиқарган қарорга кўра, маъмуриятга жамғармани ташкил этиш ёки унинг ишини бошлаш бўйича ҳар қандай кейинги ҳаракатларни амалга ошириш тақиқланди. Ушбу қарор камида 12 июнгача амал қилади.

Адлия вазирлиги ўтган ҳафта Трампнинг солиқ декларациялари ошкор бўлиши юзасидан Солиқ хизмати (IRS)га қарши даъвоси бўйича келишув доирасида “Ҳукумат томонидан таъқибларга қарши жамғарма” (Anti-Weaponization Fund) ташкил этилишини маълум қилган эди.

1,776 миллиард долларлик ушбу жамғарма беш нафар аъзодан иборат комиссия назоратида бўлиши режалаштирилган. Жамғарма “сиёсий босим” ёки “қонун орқали таъқиб” қурбони бўлганини исботлай олган шахсларга компенсация тўлаши керак эди. Бу атамаларни Трамп ва унинг тарафдорлари ўзларига қарши олиб борилган терговлар ва жиноий ишларга нисбатан қўллаб келади.

Суд қарори Democracy Forward ташкилоти томонидан берилган даъво асосида қабул қилинган. Ташкилот Трамп маъмурияти томонидан сиёсий рақиб сифатида нишонга олинган шахслар мазкур жамғарма маблағларидан фойдалана олмаслигини таъкидлаган.

“Бу шаффофлик, қонун устуворлиги ва Америка халқи учун ғалаба”, деган Democracy Forward раҳбари Скай Перриман. 

Унинг фикрича, ҳеч бир маъмурият давлат маблағларини сиёсий мукофот дастури сифатида тақсимлаш ваколатига эга эмас. Адлия вазирлиги эса жамғарма қонуний эканига ишонч билдириб, компенсация олиш учун ҳеч қандай партиявий талаблар қўйилмаслигини маълум қилган.

Жамғарма ҳатто Трампнинг айрим республикачи тарафдорлари томонидан ҳам танқид қилинган. Улар 2021 йил 6 январда Капитолийга қилинган ҳужум иштирокчилари ҳам давлат маблағлари ҳисобидан товон олиши мумкинлигидан норози бўлган. Танқидчилар эса бу жамғармани Трампнинг сиёсий иттифоқчиларини рағбатлантириш учун мўлжалланган “махфий сармоя фонди” деб аташмоқда.
Судья Бринкема жамғарма маблағлари қайтариб бўлмайдиган тарзда тарқатиб юборилишининг олдини олиш учун вақтинчалик чеклов зарурлигини таъкидлади.

Эслатиб ўтамиз, аввалроқ АҚШ федерал суди Президент Дональд Трамп номининг Кеннеди номидаги саҳна санъати марказига берилишини ноқонуний деб топди ва марказни таъмирлаш учун ёпиш режасини тўхтатган эди.