АҚШ Венесуэладан 100 млн долларлик олтин олиб чиқди 

АҚШ Ички ишлар вазири Даг Бургумнинг таъкидлашича, Қўшма Штатлар Венесуэладан аллақачон 100 миллион долларлик олтинни олиб чиқиб кетган. Бу ҳақда у “Fox News” телеканалига маълум қилди.

Бунгача АҚШ Венесуэланинг “Minerven” олтин қазиб олувчи компанияси билан операцияларни, жумладан, Венесуэла олтинини АҚШга ташиш, сотиш, қайта ишлаш ва қайта сотиш билан боғлиқ транзакцияларни амалга оширишга рухсат берган.

“Жума куни Венесуэладан Қўшма Штатларга саноат мақсадларида ҳамда бошқа тижорат эҳтиёжлари учун 100 миллион долларлик олтин келиб тушди”, дейди Бургум.

“Axios” порталининг хабар беришича, “Minerven” компанияси 650 килограммдан 1000 килограммгача бўлган олтин қуймаларини “Trafigura” хомашё трейдерига сотиш бўйича келишувга эришган, трейдер эса ўз навбатида уни Американинг қайта ишлаш заводларига топширади.

Бундан олдин Бургум Венесуэланинг вақтинчалик президенти Делси Родригес билан музокаралар якунида Америка бизнеси республиканинг қазиб олиш секторига кенг кўламли инвестициялар киритишга тайёрлигини билдирган.

Эслатиб ўтамиз, аввалроқ Қўшма Штатлар Венесуэла президенти вазифасини бажарувчи Делси Родригес бошчилигидаги янги ҳукуматини расман тан олганди.