АҚШда иммиграция ходимлари 2 ёшли қизчани ҳибсга олди

Жорий йилнинг 22 январь куни АҚШ Иммиграция ва божхона назорати (ICE) ходими Миннесота штатида 2 ёшли қизчани отаси билан ҳибсга олди. ICE ота ва қизни суд қилиш учун Техасга олиб кетган. Бу ҳақда “The Guardian“ хабар қилди.

Қайд этилишича, суд ҳужжатларида Элвис Жоэл Те деб кўрсатилган ота ва унинг қизи 22 январь куни соат 13:00 атрофида дўкондан уйга қайтаётганларида офицерлар томонидан тўхтатилиб, ҳибсга олинган. Ўша куни кечқурун федерал судья қизчани соат 21:30 га қадар қўйиб юборишни буюрган. Бироқ федерал амалдорлар суд қарорига бўйсунмай, бунинг ўрнига ота ва болани Техас штатидаги ҳибсхонага юборган.

Кеча, 23 январь куни тушдан кейин иммиграция расмийлари иккаласини ҳам Миннесота штатига қайтариб олиб борган. Оиланинг адвокатлари икки ёшли болани онасининг қарамоғига олиб берган. Қизалоқнинг отаси эса Миннесота штатида ҳибсда қолган.

Бу ICE’нинг биринчи марта қилган номақбул иши эмас. Январь ойи бошида автомобилда ҳаракатланиб кетаётган аёлни отиб ташлаган эди.

Нашрга кўра, ICE ҳаракатлари халқаро миқёсда норозиликларга ва АҚШ Президенти Дональд Трамп маъмуриятининг минтақадаги тажовузкор чораларига қарши кучайган текширувларга сабаб бўлиши мумкин.

Эслатиб ўтамиз, аввалроқ АҚШда ICE ходимларига суд қарорисиз уйларга киришга рухсат берилгани ҳақида хабар қилинган эди.