АҚШда Трампнинг қароргоҳига “совчи” бостириб кирди

АҚШ Президенти Дональд Трампнинг Флорида штатидаги Мар-а-Лаго қароргоҳига бостириб кирган америкалик йигит ҳибсга  олинди. У Президентнинг набирасига уйланишни хоҳлашини айтган. Бу ҳақда NBC News хабар берди.

Маълум бўлишича, АҚШ Махфий хизмати агентлари техаслик  23 ёшли Энтони Рейесни Трампнинг Флорида штатидаги Мар-а-Лаго қароргоҳига ноқонуний киргани учун ҳибсга олган. Рейес 4 июнга ўтар кечаси қароргоҳни ўраб турган девордан ошиб ўтганидан сўнг қўлга олинган. У бу ҳаракатини “Инжилни тарғиб қилиш” ва “Кайга уйланиш” истаги билан изоҳлаган. Гап АҚШ Президентининг 18 ёшли набираси ҳақида кетмоқда.

Агентлар уни полицияга топширган. Рейесга хусусий ҳудудга ноқонуний кирганлик айби қўйилган ва суд уни ҳибсга олган. Рейес 50 минг доллар гаров эвазига озод қилиниши мумкин, аммо унга Трамп ва унинг оиласи билан ҳар қандай алоқа қилиш тақиқланган. Йигит эса ўзини айбдор деб ҳисобламаяпти. 

Оқ уй воқеани Трампга етказганини маълум қилган.  

Маълумот учун, Кай Трамп – кичик Дональд Трамп ва унинг собиқ рафиқаси Ванесса Трампнинг қизи. У, шунингдек, Трампнинг ўнта неварасининг энг каттаси.

Эслатиб ўтамиз, сўнгги бир йил ичида Дональд Трампнинг ҳаётига икки маротаба суиқасд уюштирилди. Биринчи суиқасд 2024 йил 13 июлда Пенсильваниянинг Батлер шаҳрида сайлов кампанияси вақтида содир бўлган. Иккинчи ҳолат 15 сентябрда Флорида штатининг Палм-Бич шаҳридаги Трамп гольф-клуби яқинида рўй берган.