Қадрланмаган жойни тарк этинг

16 январь куни Ўзбекистон Республикаси Президенти Шавкат Мирзиёевнинг Олий Мажлис ва Ўзбекистон халқига йўллаган Мурожаатномасининг мазмун-моҳияти, шунингдек, Миллий тикланиш демократик партиясининг 2025 йилги фаолияти якунлари бўйича матбуот анжумани ўтказилди. 

Президент мурожаатномаси муҳокамасидан сўнг, партиянинг ўтган йилги фаолияти ҳақида қисқача гапириб ўтилди. Анжуманнинг журналистлар билан мулоқот қисмида ОАВ ходимлари жамият учун муҳим ва айни муҳокамадаги саволлар билан Олий Мажлис Қонунчилик палатаси спикерининг ўринбосари, “Миллий тикланиш” партияси раиси Алишер Қодиров  билан юзланди. 

Унда Ўзбекистоннинг ички ишларига аралашаётган айрим хорижлик пропагандист “ақллилар”нинг мамлакатга киришини чеклаш масаласи кўтарилди. Қодиров бунга Ўзбекистоннинг бағрикенглик сиёсатини қўрқоқлик деб билиш керак эмаслигини айтди.

“Андишани отини қўрқоқ деб қўйиш деган мақол бор-ку, Ўзбекистонни  бағри кенглигини, Ўзбекистонни тинчликпарвар сиёсатини ўзича талқин қилаётган айрим кучларга энди сал кескинроқ қараш вақти келди деб ўйлайман”.

QALAMPIR.UZ журналисти сўнгги йилларда хорижда, хусусан Россияда, ўзбекистонликларга нисбатан таҳқирлаш ва босим ҳолатлари кузатилаётгани ва бунга жавобан айтарли ҳеч қандай амалий чора кўрилмаётгани юзасидан, “Бу каби вазиятларни назорат қилишни партиялар зиммасига олиб, номақбул шахслар рўйхатини Парламентга киритадими?”, деган таклифли савол билан мурожаат қилди. Депутат бунга жавобан, бу масала бўйича “Миллий тикланиш” демократик партияси шуғулланмаса, бошқа ҳеч ким шуғулланмаслигини алоҳида таъкидлаб айтди.

“Биз шуғулланамиз, чунки охирги марта мана бу Соловьёв гапириб чиққандан кейин, энди биз шуғулланмасак, бошқа ҳеч ким шуғулланмас экан, деган хулосага келиб бўлдик. Бу билан жиддий шуғулланмоқчимиз. Шу рўйхатни киритиб, Ташқи ишлар вазирлиги билан муҳокама қиламиз. Натижаси учун албатта ваъда бера олмайман, чунки қарор масаласи бор. Лекин таклиф бериш ва ташаббус кўрсатиш масаласини ўрнатамиз”,

Шу ўринда эслатиб ўтамиз жоизки, амалдаги қонунга кўра, Ўзбекистоннинг давлат суверенитетига, ҳудудий яхлитлиги ва хавфсизлигига зид бўлган, давлатлараро, ижтимоий, миллий, ирқий ҳамда диний адоватни келтириб чиқарувчи ҳамда Ўзбекистон халқининг шаънини, қадр-қимматини ёки тарихини таҳқирловчи оммавий чиқишлар қилган ёхуд ҳаракатлар содир этган чет эл фуқаролари (ёки фуқаролиги бўлмаган шахслар) мамлакатда бўлиши номақбул деб ҳисобланади ва уларнинг мамлакатга кириши тақиқланади.

Энди Ўзбекистон аҳолисига ҳашамат солиғи жорий этилиши мумкин. Ўзбекистон давлати яралибдики, тўй-тўй можароси тугамайди. Бола туғилиши билан уни уйлаш, дабдабали тўй-ҳашам қилиш ҳақида ўйлайди. Бу гап 100 йил олдин ҳам бўлган ҳатто Абдулла Авлоний ҳам, “Ўзбекни тўй балосидан қутқаринг”, деб айтиб кетган. Шу бало олдин ҳам бор эди, ҳозир ҳам бор.

1999 йилда Вазирлар Маҳкамаси томонидан қабул қилинган қарор, Президент қарорлари, 2010 йилда қабул қилинган қарор ва низомлар, бунга қўшимча яна 2019 йилда Олий Мажлис ва Сенат қарорлари  барчаси тўй-тадбирларни ихчамлаштириш, қисқартириш борасида эди. Бироқ бирортаси ё амалда ижро этилмади, ёки халқ ҳаммасини четга сурган холда умр давомида йиғиб терганларини тўй маъракаларга сарфламоқда.

Бу қарорлар фақатгина оддий халқ учун эмас, балки палончи-палончиларнинг, айрим амалдорларнинг дабдабали тўй маросимларига ҳам қўлланиши керак. Алишер Қодиров айнан шу масалани кўтарди. 

Унинг сўзларига кўра одамлар пулни бошқа даромад келтирадиган режаларга сарфлаши керак. Агар пули ошиб тошиб ётган бўлса улар дабдабали тўй қилсин марҳамат лекин ҳашамат солиғини тўлаб қўйибгина. Аслида тўй қилишдан мақсад икки ёшнинг никоҳини эълон қилиш. Буни тўртта одам билан ҳам, ўнта одам билан  ҳам ўтказса бўлади. “Миллий тикланиш” партияси раисининг айтишича бундан буён Ўзбекистонда дабдабали тўй ўтказаётганлар ҳар бир меҳмон учун - одам бошига АҚШ долларлаб ҳашамат солиғи тўлайди.

“Халқимизда кўрпага қараб оёқ узатиш деган гап бор. Мана шу нарсани тўғри тушуниш керак. Даромадимизни тўйларга исроф қилиш деган нарсадан қочиш лозим. Бу бизнинг – миллатимизнинг иллатлари эканлигини ҳар доим таъкидлаб келганмиз. Тўйдан мақсад икки ёшнинг никоҳини жамоатчиликка эълон қилишми, марҳамат, эълон қилайлик”.

Бироқ, тўйларга кўп пул сарфлаш яхши эмаслигини, бу пулларни бошқа фойдали нарсаларга инвестиция қилиниши кераклиги ҳам айтилди. Бунинг олдини олишнинг энг мақбул усули эса солиқ жорий қилиш.

“Ҳашаматни хоҳлаяпсизми, ҳашаматни солиғини тўлаймиз. Марҳамат! 10 000 та одам чақириб тўй қилмоқчимисиз? Тўйда одам бошига қараб солиқ ҳисоблансин, марҳамат. 10 000 та одамни солиғини долларлаб қўйинглар... Агар сизга шу керак бўлса, марҳамат!”.

Қодиров “ҳашамат солиғи” таклифи билан одамларнинг ўз маблағлари сарфини ва дунёқарашларини ўзгартириш мумкинлиги назарда тутилаётганини алоҳида урғулади.

Хабарингиз бор Россияда мигрантларга нисбатан шафқатсиз муносабат ва ҳақоратлардан, керак бўлса ОМОНчилар томонидан калтаклаб ўлдирилганидан кейин Депутат Алишер Қодиров “Ақлингизни ишлатинг, Россиядан тезроқ кетинг! Ҳеч қандай даромад ота-оналар ва фарзандларингизнинг кўз ёшига арзимайди!” дея мусофирларга қилган мурожаати қилганди. Агар мигрантлар Қодировнинг гапларига қулоқ солиқ Россияни тарк этса қаерда ишлаши ҳақида сўралди. Бунга жавобан, Мен Россияни тарк этинг дедим, лекин Ўзбекистонга қайтинг демадим дея жавоб берди депутат.

 “Россиядан мигрантларни кетишга чақирдим, қайтишга эмас”, деди Алишер Қодиров

Шунингдек, Қодиров ўзбекистонлик ватандошларга қарата ўзларини камситтириб қўймаслигини, қадрланмаётган ҳар қандай жойдан кетиши кераклигини айтди. У айнан Ўзбекистонга қайтишни назарда тутмаганини ҳам қистириб ўтди. Депутат ўз сўзларини изоҳлар экан, фақат Россияда эмас, балки бошқа ривожланган мамлакатларда ҳам иш борлигини билдирди. Шу билан бир қаторда у ўзбекистонликлар жуда меҳнаткашлигини ва ўзбек мигрантлари хор бўлиши керакмаслигини таъкидлади.

“Мигрантлар фақат Россияда эмас, балки Швеция, Норвегия, Болтиқ бўйи давлатлари, Польша, Руминия, Австрия, Германия каби давлатларга бориб ишлаши мумкин”.

Алишер Қодиров нутқи давомида, бугунги кунда кўплаб давлатлар ўзбекистонлик меҳнат мигрантларига катта қизиқиш билдирилаётганлиги қўшимча қилди. Янги йил байрами арафасида ўқитувчиларнинг навбатчилик қилгани кенг жамоатчилик эътирозига сабаб бўлганди. Матбуот анжуманида партия раҳбарига, ўқитувчиларнинг ҳақ-ҳуқуқларини партия нега ҳимоя қилмади, бунга муносабат билдирмади деган саволга, партия раҳбари Партия адвокатлик институти эмас - ҳамма, хусусан ўқитувчилар ҳам ўз ҳақ ҳуқуқларини ҳимоя қилишга ўргансин. Марҳамат судга мурожаат қилсин дея жавоб берди.

Воқеа тафсилотлари билан батафсил танишиш учун QALAMPIR.UZ’нинг YouTube’даги саҳифасидаги ушбу видеорепортажни томоша қилинг.