Америкалик жангчи  ўз мағлубиятига пул тиккани учун UFC'дан четлатилди

Америкалик жангчи Исаак Дулгарян UFC рўйхатидан чиқарилди. Бу қарор спортчини Ядиер Дель Валле билан жангида ўзининг мағлубиятига пул тикканликда гумонлангандан атиги икки кун ўтиб қабул қилинди. Бу ҳақда ESPN нашри хабар берди.

Жорий йилнинг 1 ноябрь куни Лас-Вегасда бўлиб ўтган UFC Fight Night мусобақасида енгил вазн тоифасида жанг қилган Дулгарян биринчи раундда Дел Валлега мағлуб бўлган эди. Пул тикиш фаолиятини кузатиб борувчи Integrity Compliance 360 (IC360) фирмаси жангдан бир неча кун аввал мижозларини “Дел Валлега ғайриоддий миқдорда гаровлар қўйилаётгани” ҳақида огоҳлантирган.

“Кўплаб профессионал спорт ташкилотлари сингари, биз ҳам пул тикиш фаолиятининг ҳалоллигини кузатиш учун мустақил ташкилотлар билан ҳамкорлик қиламиз. IC360 ҳар бир UFC тадбиридаги гаровларни таҳлил қилади ва 1 ноябрь куни бўлиб ўтган  Дулгарян – Дел Валле жанги билан боғлиқ фактларни батафсил ўрганмоқда. Биз бу даъволарни жуда жиддий қабул қиламиз, чунки жангчиларнинг хавфсизлиги ва спортнинг ҳалоллиги биз учун энг устувор қадриятдир”, дейилади UFC расмий баёнотида.

Маълумотларга кўра, жанг олдидан Дел Валлега катта суммаларда гаровлар тикилган. Айрим букмекерлар шубҳали фаоллик сабабли баҳсни вақтинча тўхтатган. Caesars Sportsbook эса жорий йилнинг 1 ноябрь кунги кечқурун Дулгарян фойдасига тикилган барча гаровларни қайтариб беришини эълон қилди.

Эслатиб ўтамиз, аввалроқ Туркия футбол федерацияси (ТФФ) президенти Иброҳим Ҳожиосманўғли ҳакамлар орасида кенг кўламли ўйинларга пул тикиш фаолиятини аниқлагандан сўнг федерациясия 149 нафар ҳакам ва ёрдамчи ҳакамни айбдор деб топган ва уларнинг фаолиятини тўхтатган эди.