Apple iPhone’нинг 20 йиллигига шиша смартфон чиқаради

Apple корпорацияси iPhone’нинг 20 йиллигига бағишлаб шиша смартфон чиқаради. Бу ҳақда “Bloomberg” хабар берди.

Нашр эксперти Марк Гурманнинг айтишича, Apple ўзининг биринчи смартфони тақдим этилганининг 20 йиллигини ёрқин тарзда нишонлашни режалаштирган. Бу сана 2027 йилга тўғри келади. Корпорация “мутлақо янги дизайнга эга” iPhone Pro ишлаб чиқишни ваъда қилган.

Мутахассиснинг билдиришича, юбилей смартфони асосан шишадан тайёрланади. Ҳозирги iPhone’ларда дисплей ва орқа панел шишадан ясалган. Марк Гурманнинг қайд этишича, тўлиқ шиша смартфон ишлаб чиқиш Apple'нинг собиқ бош дизайнери Жонни Айвнинг орзуси бўлган.

Хабарда айтилишича, Apple янги қурилма билан бирга ўзининг биринчи букилувчи смартфонини ҳам тақдим этиши мумкин.

Маълумот учун, биринчи iPhone чиқарилганининг 10 йиллиги муносабати билан 2017 йилда Американинг IT-гиганти iPhone Х'ни тақдим этган эди. Бу бренд тарихидаги биринчи OLED-дисплейли қурилма бўлган, шунингдек, ундан “Home” тугмаси олиб ташланган эди.

Эслатиб ўтамиз, аввалроқ Марк Гурман Apple компаниясининг келгуси авлод смартфонлари – iPhone 17 серияси сўнгги беш йил ичидаги энг катта дизайн ўзгаришларига эга бўлишини айтган эди. Гурманнинг таъкидлашича, iPhone 17 Pro модели олд томондан ўз ўтмишдошига жуда ўхшаш бўлади, аммо орқа томони бутунлай бошқача кўринишга эга бўлади. Интернетда тарқалган рендерларга кўра, бу моделда аввалги квадрат элемент ўрнига, орқа панелнинг деярли бутун кенглигини эгаллайдиган тўртбурчак шаклидаги камера модули бўлади.