“Атлетико Мадрид” Лукман трансфери бўйича келишувга эришди

“Атлетико Мадрид” Италиянинг “Аталанта” клуби билан нигериялик ҳужумчи Адемола Лукманни трансфер қилиш бўйича келишувга эришди. Бу ҳақда Ла Лига клуби матбуот хизмати хабар берди.

Клуб баёнотида таъкидланишича, нигериялик футболчи тиббий кўрикдан ўтиш ва янги шартнома тафсилотларини якунлаш учун аллақачон Мадридга етиб борган.

“Атлетико” трансфер суммаси ва шартнома муддати борасида расмий маълумот бермаган. Бироқ Испания ОАВларига кўра, мадридликлар Лукман учун тахминан 35 миллион евро тўлайди.

28 ёшли футболчи 2022 йилда Германиянинг РБ Лейпциг клубидан “Аталанта”га кўчиб ўтганидан буён барча мусобақаларда 55 та гол уриб, жамоанинг етакчи футболчиларидан бирига айланган.

Эндиликда у Диэго Симеоне қўл остида “Атлетико Мадрид” таркибини кучайтирадиган асосий трансферлардан бири сифатида қаралмоқда.

Маълумот учун, ҳозирда мадридликлар Ла Лига турнир жадвалида 45 очко билан учинчи ўринни эгаллаб турибди ва пешқадам “Барселона”дан 10 очкога ортда қолмоқда.