“Авиасозлар” бозорида яна ёнғин содир бўлди

Кеча, 4 январь куни Тошкент шаҳрининг Яшнобод туманида жойлашган “Авиасозлар” бозоридаги дўконлардан бирида ёнғин содир бўлди. Бу ҳақда Фавқулодда вазиятлар вазирлиги хабар берди.

Маълум қилинишича, соат 19:19 да Яшнобод туманининг Авиасозлар кўчасида жойлашган “Авиасозлар” деҳқон бозори АЖ ҳудудидаги дўконларнинг бири ёнаётгани тўғрисида ФВБга хабар келиб тушган.

Шунга кўра, 4 та ёнғин-қутқарув бўлинмаси соат 19:24 да воқеа жойига етиб бориб, ёнғин соат 19:29 да қуршаб олинган ва соат 19:34 да ўчирилган.

Ёнғин оқибатида дўконнинг тахминан 20 квдрат метр майдондаги ички ва шифт қисми ёниб зарарланган.

Билдирилишича, ёнғин оқибатида тан жароҳати олганлар тўғрисида маълумот келиб тушмаган ва ҳозирда ёнғин сабаби ва зарари аниқланмоқда.

Эслатиб ўтамиз, ўтган йилнинг 13 декабрь куни ҳам “Авиасозлар” бозорида ёнғин содир бўлганди. Ижтимоий тармоқларда сиздирилиган видеоларда ёнғин кўлами катта бўлганини кўриш мумкин. Интернет фойдаланувчилари бозор бутунлай ёниб кул бўлганини айтган.