Аёлга подъездда шаҳвоний шилқимлик қилган йигит қамалди

Кеча, 9 сентябрь куни жиноят ишлари бўйича Тошкент шаҳар Мирзо Улуғбек туман судида кўп қаватли уй подъездида аёлга шилқимлик қилган 19 ёшли йигитнинг иши кўриб чиқилди. Бу ҳақда “Nemolchi.uz” хабар берди.

Қайд этилишича, жорий йилнинг 8 сентябрь куни бир аёл уйига қайтаётганида подъездга унинг ортидан Б.Т. кириб олган. У ундан телефон рақамини сўраган, аёл танишишни истамаслигини айтганда эса унга тегажоғлик қилган. Аёл бақиргач, у қўрқиб подъезддан қочиб чиққан. 

Б.Т. судда айбини тан олган ва суддан жазони енгиллаштиришни сўраган. Суд эса унга Маъмурий жавобгарлик тўғрисидаги кодекснинг 41-1-моддаси (Шаҳвоний шилқимлик қилиш) асосида 5 сутка қамоқ жазоси тайинлаган. Маълум бўлишича, 2006 йилда туғилган шахс аввал ҳам маъмурий ҳуқуқбузарлик учун жавобгарликка тортилган.

Эслатиб ўтамиз, аввалроқ Тошкент шаҳрида 44 ёшли шифокор бемор аёлни тиббий кўрикдан ўтказиш баҳонасида унинг танасига тегиниб, шаҳвоний шилқимлик қилгани учун 5 суткага қамалгани ҳақида хабар берилган эди. Шифокор судда ўз айбини тан олиб, қилган ишидан чин кўнгилдан пушаймонлигини билдирган ва бемор ҳамда унинг оила аъзоларидан узр сўраган.