Азиз Мағрупов яна янги лавозимга тайинланди

Ўзбекистон Республикаси Президентининг ташқи инвестициялар бўйича вакили лавозимида ишлаб келаётган Азиз Йўлдошевич Мағрупов янги лавозимга тайинланди. Бу ҳақда Президент Шавкат Мирзиёевнинг тегишли фармони қабул қилинди.

Фармонга кўра, Азиз Йўлдошевич Мағрупов Ўзбекистон Республикаси Президентининг ҳудудий ривожланиш бўйича маслаҳатчиси ўринбосари лавозимига тайинланди ва шу муносабат билан Ўзбекистон Республикаси Президентининг ташқи инвестициялар бўйича вакили лавозимидан озод этилди.

Маълумот учун, Азиз Мағрупов 2018 йилда  Президент Администрацияси раҳбари ўринбосари лавозимига тайинланган. 2023 йилнинг 25 август куни Президент Администрациясининг янги таркиби тасдиқланди ва унга кўра, Азиз Мағрупов Президент ёрдамчиси лавозимига тайинланди. 2025 йил 23 июнь куни Президент фармони билан Администрация тузилмасига ўзгартиришлар киритилди ва Президент ёрдамчиси курсисини эгаллаб келаётган Азиз Мағрупов Президентнинг ташқи инвестициялар масалалари бўйича маслаҳатчиси лавозимига тайинланганди. Бир ойдан сўнг эса у Президентининг ташқи инвестициялар бўйича вакили лавозимига тайинланди.