Бангладешдаги аэропортда катта ёнғин содир бўлди (видео)

Бугун, 18 октябрь куни Бангладеш пойтахти Даккадаги Хазрат Шоҳжалол халқаро аэропортининг юк терминалида йирик ёнғин содир бўлди. Бу ҳақда “Prothom Alo” нашри хабар берди.

Нашрнинг ёзишича, ҳодиса маҳаллий вақт билан тушдан кейин, соат 14:30 атрофида импорт товарлари сақланадиган аэропортнинг юк терминалида ёнғин чиқиши ортидан содир бўлган.

Аэропортнинг ижрочи директори Масудул Ҳасан Масуднинг сўзларига кўра, ёнғинни ўчириш бўйича фавқулодда чоралар кўрилмоқда.

Бошқарувлараро жамоатчилик билан алоқалар хизмати хабарига кўра, ёнғин Бангладеш фуқаролик авиацияси бошқармаси, Ёнғин хавфсизлиги хизмати ва Бангладеш ҳарбий-ҳаво кучларининг иккита ёнғин бўлинмаси томонидан қўшма ҳаракатлар билан назорат остига олинган. Ёнғинни бартараф этишга мамлакат ҳарбий-денгиз кучлари ҳам жалб этилган.

“The Daily Star” нашрининг Даккадаги аэропортдаги манбаларига кўра, турли авиакомпанияларнинг камида бешта рейси бошқа йўналишга – Чаттограмдаги Шоҳ Аманат ва Силҳетдаги Осмони аэропортларига йўналтирилган.

Эслатиб ўтамиз, аввалроқ АҚШнинг Нью-Йорк штатидаги ЛаГуардиа аэропортида Роанок шаҳрига жўнаб кетаётган самолёт қаноти Шимолий Каролина штатининг Шарлотт шаҳридан келган самолётнинг фюзеляжи билан тўсатдан тўқнашиб кетган эди. Роанок шаҳрига кетаётган самолёт бортида 35 киши, Шарлотт шаҳридан келган самолёт бортида эса 61 киши бўлган. Нью-Йорк ва Ню-Жерси аэропорт маъмуриятининг баёнотига кўра, жароҳат олган шахс шифохонага ётқизилган.