“Барселона” – “Реал Мадрид”: Эл Класико, Ла Лига тарихи, Вальверде ва Мбаппе

Нафақат испан футболининг, балки дунёнинг икки гиганти “Барселона” ва “Реал Мадрид” 10 май куни Испания Ла Лигаси доирасидаги 264-Эл Класико баҳсида тўқнаш келади. Бу мумтоз тўқнашув ҳар галгидек дунёни ўзига қаратиб, иккига бўлинишга мажбур қилиши эса инкор қилиб бўлмас ҳақиқатдир.

Бу сафарги учрашув Каталония мезбонлигида, айниқса кескин муҳитда ўтиши кутилмоқда. Агар руҳан тушкун ҳолатдаги, турли ички муаммолар гирдобида юрган қироллик клуби ўзининг энг асосий рақибига бу сафарги баҳсда нафақат мағлуб бўлиши, балки шу орқали лига чемпионлигини ўзлари топшириши ҳам мумкин. Албатта, бу қаймоқ ранглиларга нақадар аламли бўлса, рақибларга шу қадар ёқимли ҳолат бўлиши турган гап. Ҳар икки жамоа ҳам UEFA Чемпионлар лигасида чорак финалда мағлуб бўлганидан кейин, улардаги ягона курашув мотиви мана шу Ла Лига чемпионлигини ҳал қилувчи Эл-Классико бўлиб турибди. Қуйида ўйин олдидан асосий мавзулар ва 124 йиллик рақобат тарихи ҳақида озроқ тўхталиб ўтамиз.

Килиан Мбаппе “Барселона”га қарши ўйнайдими?

Килиан Мбаппенинг майдонга тушиш-тушмаслиги якшанба кунги ўйин атрофида борётган асосий мавзулардан бири бўлиб турибди. Франциялик ҳужумчи сон мушакларидаги жароҳат сабаб Эл Класикони ўтказиб юбориш эҳтимоли катта. 27 ёшли форвард бу мавсум Испания чемпионатида 24 гол билан тўпурарлар рўйхатини бошқармоқда. “Мальорка” ҳужумчиси Ведат Мурики 21 та гол билан иккинчи ўринда. Мавсумнинг жароҳат сабаб якунлаган “Барселона” футболчиси Ламин Ямал эса 16 та гол билан учинчи ўринда.

Охирга вақтларда тармоқларда жуда кўп мухлислар томонидан ҳужумчининг клубдан кетиши кераклиги ҳақида тез-тез овозлар янграмоқда. “Диктатор”нинг кетишини истаганлар оз эмас. Улар аллақачон эркин овозларини тўплаб ҳам қўйган. Ҳужумчининг голларга бой мавсуми ўтётган бўлса ҳам, уни сотиб юборишни талаб қилувчи петиция 33 миллиондан ортиқ имзо тўплаган. У икки мавсум аввал Париж клубидан “Реал”га ўтган эди.

Федерико Вальверде билан нима бўлди?

Сўнгги ўйинларда исталган позициясида ҳам жамоа учун борини берётган Федерико Вальверде Эл Класикода аниқ иштирок этмайди. 7 май куни машғулот пайтидаги жанжалдан кейин ярим ҳимоячи шифохонага ётқизилган. 27 ёшли уругвайлик футболчи жамоадоши Орельен Тчуамени билан машғулот пайтидаги жанжалли тўқнашувдан кейин бошидан жароҳат олгани ҳақида ОАВлар бонг урмоқда. Футболчининг ўзи эса буни рад қилган. У жамоадоши билан келишмовчилик бўлганини тан олган, аммо жароҳат тасодифий йиқилиш оқибатида эканини таъкидлаган.

“Реал” воқеа бўйича ички текширув бошланганини маълум қилди ва ҳар икки футболчига нисбатан интизомий иш очди. Тчуамени Классикода ўйнай олиши ёки йўқлиги ҳозирча номаълум.

Чемпионликка ярим қадам

Альваро Арбелоа бошқарётган “Реал” амалдаги чемпион Ханс-Дитер Флик жамоасидан 11 очко ортда қолмоқда. Мавсум якунига эса тўрт тур қолиб, шунинг ҳал қилувчиси олдиндаги Эл-Классико бўлиб турибди. Бордию, бу мумтозда мадридликлар ғалаба қозонолмаса, “Барселона” ўз стадионида азалий рақибини енгиб чемпионликни расман қўлга киритади.

Эл Класико нима дегани?

“El Clasico” атамаси илк бор 1960 йилларда Испания газеталарида мамлакатнинг икки энг катта клуби ўртасидаги ўйинларга нисбатан қўлланилган. Унинг оддий таржимаси – “Мумтоз баҳс”. Ўша пайтдаёқ бу учрашув спортдаги энг кескин дербилардан бири сифатида қабул қилинган.

Аввалроқ “Viejo Clasico” (“Эски классика”) атамаси “Реал Мадрид” ва “Атлетик Билбао” ўртасидаги баҳсга нисбатан ишлатилган. Тарихан бу Испания футболидаги энг кўп ўтказилган учрашув бўлган. Кейинчалик “Барселона” мамлакатнинг энг йирик клубларидан бирига айлангач, Эл Класико атамаси оммалашган.

1990 йилларда рақобат янги даражага чиққан. Йохан Кройф бошқарган “Барселона” дунёдаги энг хавфли жамоалардан бири эди. Шу билан бирга, “Реал”да Зинедин Зидан, Роналдо ва Дэвид Бекхэм каби юлдузлар тўпланган “Галактикос” таркиби шаклланган. Кейинчалик Пеп Гвардиола ва Жозе Моуринью қарама-қаршилиги, шунингдек Лионель Месси ва Криштиану Роналду рақобати Эл Класикони янада машҳур қилди.

Биринчи Эл Класико қачон бўлган?

“Барселона” ва “Реал Мадрид” клублари ўртасидаги илк учрашув 1902 йил 13 май куни Copa de la Coronacion мусобақасида бўлиб ўтган. Ўша баҳсда каталон клуби Мадридда Madrid FC (кейинчалик “Реал Мадрид”)ни 3:1 ҳисобида мағлуб этган.

Ким кўпроқ ғалаба қозонган?

Ўзаро баҳсда бу икки рақиблар бир-бири билан “қувлашмачоқ” ўйнашини статистик сонлардан ҳам кўриш мумкин.124 йиллик рақобат давомида икки жамоа ўртасида 261 учрашув ўтказилган. Уларнинг 106 тасида қироллик клуби ғалабага қўлга киритган бўлса, “Барса” ҳисобидаги зафарлар сони 105 та. Қолган ўйинларда дурранг қайд этилган

Ла Лига тахтидаги “қирол” эса ўз номига мос қироллик клуби – “Реал Мадрид”. Қаймоқ ранглилар ўз лигаларида 36 марта чемпион бўлган. “Барселона” эса айни кунларда 28-чемпионлик учун курашмоқда.

Эл Класико тарихида ким энг кўп гол урган?

1. Лионель Месси – 26 гол (“Барселона”)
2. Альфредо Ди Стефано – 18 гол (“Реал”)
3. Криштиану Роналду – 18 гол (“Реал”)
4. Карим Бензема – 16 гол (“Реал”)
5. Рауль – 15 гол (“Реал”)

Сўнгги бешта Эл Класико натижалари:

• 2026 йил 11 январь – Испания Суперкубоги финали: “Барселона” 3:2 “Реал”
• 2025 йил 26 октябрь – Ла Лига: “Реал” 2:1 “Барселона”
• 2025 йил 11 май – Ла Лига: “Барселона” 4:3 “Реал”
• 2025 йил 26 апрель – Испания Кубоги финали: “Барселона” 3:2 “Реал”
• 2025 йил 12 январь – Испания Суперкубоги финали: “Реал” 2:5 “Барселона”

Ойбек Рустамов