Беморнинг 11 та тишини нотўғри олиб ташлаган стоматологлар қамалди

Италиянинг Генуя шаҳридаги стоматологлар беморнинг 11 тишини ортиқча ва кераксиз равишда олиб ташлагани учун жавобгарликка тортилди. Бу ҳақда “Corriere della Sera” нашри хабар берди.  

Манбага кўра, 55 ёшли аёл интернет орқали арзон нархларда хизмат кўрсатадиган шифокорларни топиб, стоматологик муолажалар олишга қарор қилган. Консультация давомида мутахассислар беморни ишнинг кўп қисмини бир кунда бажаришга ишонтирган, унга махсус протезларни кўрсатишган, аммо рентген текширувини ўтказишмаган. Шифокорлардан бири процедурасиз барча тишларини йўқотишини айтган.

Оқибатда тўрт соат ичида аёлнинг 11 та соғлом тиши олиб ташланган. Учинчи куни унга протезлар қўйилган, аммо улар ваъда қилинганидан фарқ қилган ва вақтинчалик экани маълум бўлган.

Жабрланувчи операция оқибатида жиддий қийинчиликларга дуч келган: у гапира олмай, тўғри овқатлана олмаган ва ҳаёт сифати оғирлашган. Бу унинг шахсий ҳаётига ҳам таъсир қилган: тиш муаммолари ва оқибатларидан уялиб, севгилиси билан ажрашган. Кейинчалик бошқа стоматолог унга жарроҳлик амалиётини ўтказган бўлса-да, аёл ҳануз овқатни яхши чайнай олмайди.

Суд қарорига кўра, 11 тишини нотўғри олиб ташлаган стоматологларнинг бириси уч ой, иккинчиси бир йилу беш ойлик қамоқ жазосига ҳукм қилинган ва аёлга 14 300 евро тўлов пули тўланган.