Бир неча ой ичида ЖЧга тўлиқ тайёр бўламиз – Мексика Президенти 

Мексика Президенти Клаудия Шейнбаум 2026 йилги футбол бўйича Жаҳон чемпионати учун мамлакатда олиб борилаётган инфратузилма лойиҳалари турнир бошланишига қадар тўлиқ якунланишини маълум қилди. Бу ҳақда ESPN нашри хабар берди.

Президентнинг сўзларига кўра, федерал ҳукумат Мехико халқаро аэропортидаги иккита терминални таъмирлаш учун 489 миллион доллар сармоя киритмоқда. Шунингдек, Мехико шаҳридан тахминан 30 миль узоқликда жойлашган Санта-Лусиядаги Фелипе Анхелес халқаро аэропорти билан пойтахтни боғлайдиган поезд линияси қурилиши ҳам якунланиш арафасида.

“Бу нафақат энг зўр футболни томоша қилиш вақти, балки бутун дунёга кимлигимизни кўрсатиш фурсати. Мексика улкан маданий меросга эга, тарихий даврни бошдан кечираётган мамлакат. Биз бир неча ой ичида тўлиқ тайёр бўламиз”,  дейди Шейнбаум.

2026 йилги Жаҳон чемпионатининг жами 13 та ўйини Мексикада ўтказилади. Уларнинг 5 таси Мехико шаҳрида, қолган 8 таси эса Гвадалахара ва Монтеррейда бўлиб ўтади.
Шейнбаумнинг айтишича, бошқа федерал лойиҳалар ҳам Мексиканинг шимолидаги Монтеррей ва ғарбий Гвадалахарада амалга оширилмоқда. Бу лойиҳаларга оид батафсил маълумотлар келгуси ҳафталарда эълон қилинади.

Жаҳон чемпионати очилиш ўйинига мезбонлик қиладиган “Ацтека” стадиони таъмирлаш учун вақтинча ёпилган. Стадионга сармоя хусусий компания томонидан киритилмоқда, аммо лойиҳа тафсилотлари ҳозирча ошкор этилмаган.

Президентнинг сўзларига кўра, Мексика учта мезбон шаҳар бўйлаб 5,5 миллиондан ортиқ меҳмонни кутмоқда. Шейнбаум бу жараён мамлакат иқтисодиётига сезиларли ижобий таъсир кўрсатишини алоҳида таъкидлади.

Эслатиб ўтамиз, аввалроқ 2026 йил АҚШ, Канада ва Мексикада ўтказиладиган футбол бўйича Жаҳон чемпионати ўйинларига бир миллиондан ортиқ чипта сотилгани ҳақида хабар берилган эди.