Бишкекда блэкаут содир бўлди

Бугун, 18 июнь куни Қирғизистон пойтахти Бишкек шаҳрида кенг кўламли электр таъминоти узилиши – блэкаут содир бўлди. Бу ҳақда “Вести.kg.” хабар берди.

Нашрнинг ёзишича, шаҳар аҳолиси кучланиш аввалига кескин тушиб кетгани, сўнг бутунлай йўқолгани ҳақида хабар берган. Электр энергияси бўйича узилишлар бутун Чуй вилоятини ҳам қамраб олган.

Мамлакат Энергетика вазирлиги электр таъминоти узилишини подстанциядаги авария билан изоҳлаган. Дастлабки маълумотларга кўра, электр босқичма-босқич қайта узатилмоқда.

“24.kg” нашрининг хабар беришича, Қозоғистон билан чегарадош ҳудудларда ҳам электр йўқ, шу сабабли одамлар чегара постларидан ўтказилмаяпти.

Шунингдек, “НЭСК” ОАЖ тармоғида юзага келган аварияли ҳолат туфайли “Бишкек ИЭМ” ва “Бишкектеплосет” коммунал корхоналарининг мутахассислари иссиқлик таъминотини нормаллаштириш устида тиклаш ишларини олиб бормоқда.

Шаҳар ҳокимлиги электр станцияси юкламасини ошириш ва иссиқлик тармоқларининг гидравлик режимини тиклаш чораларини кўраётганини билдирган. Қувватни қайта тўлиқ тиклаш вақт талаб қилади, шунинг учун 24 соат давомида истеъмолчиларда иссиқ сув ҳарорати сезиларли даражада пасайиши мумкин.

Шунингдек, шаҳар ҳокимияти аҳолидан вазиятни тушунишни сўраб, иссиқ сув таъминотини тез орада барқарорлаштириш учун барча кучлар сафарбар этилганини маълум қилган.

Эслатиб ўтамиз, жорий йилнинг апрель ойида Европанинг Испания, Португалия ва Франция каби мамлакатларининг айрим қисмларида элект энергияси узилиб қолганди. Оқибатда светофорлар, лифтлар, метро ва трамвайлар ишламай қолган.

Кеча, 17 июнь куни Испания Экология ва демография вазирлиги ушбу  блэкаут сабабларини ўрганиш натижаларини тақдим этди. Унга кўра, электр тармоғидаги носозлик “кўп факторли” бўлган, бироқ бунга қандайдир киберҳужум сабаб бўлмагани аниқ. Вазир Сара Аагесеннинг хабар беришича, асосий сабаблар техник ва ташкилий хусусиятга эга.