Бош вазирни ўлдирмоқчи бўлган эркак қамалди

Суд Словакия Бош вазири Роберт Фицога суиқасд уюштиришга уринган ёзувчи Юрай Цинтулани 21 йиллик қамоқ жазосига ҳукм қилди. Бу ҳақда “Čas.sk” хабар берди.

Судья ҳимоячининг Цинтуланинг Бош вазирни ўлдириш ниятида эмаслиги ҳақидаги важларини рад этди. Цинтула терроризмда айбланган. У ҳукм устидан Олий судга шикоят қилиши мумкин. Иш бўйича биринчи суд мажлиси 8 июль куни бўлиб ўтган. Суд мажлисларида судланувчи ўз сабабларини баён этган ўнлаб ёзувлар, телефон қўнғироқлари ва ҳужжатли далиллар келтирилди.

Фицонинг қўриқчилари судда Бош вазирнинг ҳаётини сақлаб қолиш учун қандай зудлик билан аралашишга мажбур бўлганликлари ҳақида гувоҳлик берди. Шифокорлар ўқлар унинг қорнига, билак ва бош бармоғига текканини ва уларнинг тезкор аралашуви сиёсатчининг ҳаётини сақлаб қолганини тасдиқлади.

Айланувчининг адвокати бу терроризм эмас, норозилик эканини таъкидлаб, ишни қайта таснифлашни талаб қилди. Бироқ прокурорга кўра, Цинтуланинг мақсади “инсонга зарар етказиш эмас, балки давлат институтларига ҳужум қилиш ва жамиятни қўрқитиш” эди. Унинг таъкидлашича, унинг ҳаракатлари терроризмнинг барча белгиларига эга, чунки бу “мамлакатни беқарорлаштиришга қаратилган сиёсий мақсадли ҳужум”.

Цинтуланинг ўзи хотиржамлик билан судга келди. У ўз ҳаракатларини “қотилликка уриниш эмас, норозилик фарёди” деб таърифлаган. Цинтула, у энди Бош вазир бўлиб хизмат қила олмаслиги учун Фицога зарар етказишга қарор қилганини, лекин уни ўлдириш ниятида эмаслигини тушунтирди. У ўз ҳаракати учун Гандловадаги ҳукумат йиғилишини танлади. Фицо ўз тарафдорларига яқинлашганда, Цинтула қуролидан беш марта ўқ узди.

“Мен уни ўлдирмоқчи эмасдим, тушунишини истардим”, деди у якуний сўзида.

Судья ҳукмни тушунтирар экан, Цинтула Бош вазирга қарата беш марта ўқ узиб, унга оғир тан жароҳати етказганини айтди.

“У уни Бош вазирлик вазифасини бажариш қобилиятидан маҳрум қилиш ниятида ҳаракат қилган”, дейилади суд ҳужжатида.

Маълумот учун, ўтган йилнинг 15 май куни Словакия Вазирлар Маҳкамаси йиғилишидан сўнг Бош вазир Роберт Фицо ташқарида йиғилганлар олдига чиққанида, унга қарата ўқ узилганди. Оқибатда Бош вазир ерга йиқилиб, унинг кўкрак соҳаси ва қорин қисмига жароҳат етказилганди. Шундан сўнг, Фицо зудлик билан шифохонага ётқизилди.

Мамлакат Ички ишлар вазирлиги раҳбари Матуш Шутай-Эшток эса Фицога суиқасд уюштирмоқчи бўлган Юрай Цинтула ҳеч қандай радикал гуруҳга аъзо бўлмагани, аммо ҳукуматга қарши намойишларда қатнашганини билдирди. Цинтуланинг ўзи ҳужумни бир неча кундан бери режалаштирганини тан олганди. Мамлакат Бош прокурори Марос Зилинкан Бош вазирга қилинган суиқасдни террорчилик ҳужуми сифатида баҳолади.

Эслатиб ўтамиз, аввалроқ Словакия Бош вазири суиқасддан кейин биринчи марта кўриниш бергани хабар қилинганди.