Бойсунда 1 тоннадан ортиқ нефть дарёга оқиб кетгани маълум бўлди (видео)

Аввалроқ, Сурхондарё вилоятининг Бойсун туманида нефть аралаш суюқлик дарёга қўшилиб кетгани ҳақида хабар берилган эди. Мазкур ҳолат бўйича 8,5 миллиард сўмдан ортиқ компенсация тўлови ҳисобланди. Бу ҳақда Экология ва иқлим ўзгариши миллий қўмитаси хабар берди.

Қайд этилишича, ўрганиш давомида Boysun туманида “Surxan Gas Chemical Operating Company” МЧЖ қўшма корхонасига қарашли қудуқдан нефть маҳсулотлари бўлган суюқлик қайнаб чиқиш ҳолати кузатилганлиги аниқланган. Бу суюқлик табиий сув ҳавзасига тушишининг олдини олиш мақсадида қўшма корхона томонидан “Eriell Oilfield Services Middle East DMCC” корхонасининг махсус техникалари ёрдамида 11 та ҳандақ қазилиб, жойлаштирилган.

Шунингдек, ўрганиш давомида жорий йилнинг 23 апрель куни Бойсун туманидаги кучли ёғингарчиликлар оқибатида 1,2 тонна нефть маҳсулоти бўлган суюқлик Хонгаронсойга оқиб кетганлиги аниқланган. Оқибатда Вазирлар Маҳкамасининг 2021 йил 12 апрелдаги 202-сон қарорига асосан компенсация тўловлари ҳисоб-китоб қилинганда 8,5 миллиард сўмдан ортиқни ташкил қилган.

Билдирилишича, ҳозирда ҳолат бартараф этилиб, сув нефть аралаш суюқликдан тозаланган. Шунингдек, ўрганиш ишлари давом этмоқда ва жараён якунланганидан сўнг тўпланган ҳужжатлар ҳолатга ҳуқуқий баҳо бериш учун ҳуқуқни муҳофаза қилиш органларига тақдим қилинади.