Бу Учинчи жаҳон уруши билан якунланади – Трамп

АҚШ Президенти Дональд Трамп Украина можаросини тартибга солиш контекстида учинчи жаҳон урушига олиб келиши мумкин бўлган “ўйинлар” ҳақида огоҳлантирди. Бу ҳақда Трамп 11 декабрь куни Оқ уйда бўлиб ўтган учрашув чоғида сўз очди.

У бу мурожаат кимга қаратилганини аниқ айтмаган, бироқ Президентнинг сўзлари Украина билан боғлиқ контекстда янграган. 

“Бундай ишлар Учинчи жаҳон урушлари билан якунланади. Мен яқинда айтгандим: агар ҳамма шундай ўйинларни давом эттирса, охир-оқибат Учинчи жаҳон урушига бориб тақалади. Биз эса бундай ҳолатни кўришни истамаймиз”, деган Трамп. 

Президентнинг қўшимча қилишича, агар вазият назоратдан чиқиб кетмаса, бу “Қўшма Штатларга таъсир қилмас эди”. Трампнинг фикрича, АҚШ можаронинг ўзида иштирок этмаяпти, фақат музокараларда қатнашмоқда, бироқ Украина ва Европа Вашингтоннинг вазиятни ҳал этишда фаолроқ бўлишини хоҳлаяпти. Шу билан бирга, Вашингтон НАТО давлатларига қурол сотмоқда ва бу қуроллар кейинчалик Киевга етиб бормоқда. 

Оқ уй раҳбарининг айтишича, у Вашингтон Россия ва Украина билан келишувга жуда яқин келган деб ўйлаган, аммо ҳудудлар масаласи жуда муаммоли бўлиб чиққан.

“Бу биласизми, бироз мураккаб, чунки сиз ерларни маълум бир тарзда бўляпсиз. Бу осон иш эмас. Бу мураккаб кўчмас мулк битимига ўхшайди, фақат минг баробар қийинроқ”, деган Трамп. 

Оқ уйдаги тадбирда республикачи, шунингдек, АҚШ Россия-Украина можароси бўйича тинчлик режасидан “қандайдир бандларни олиб ташлаганини” айтган. Унинг сўзларига кўра, битим концепцияси Украина Президенти Владимир Зеленскийга ҳам, Украина халқига ҳам ёққан.

Эслатиб ўтамиз, аввалроқ АҚШ Президенти Дональд Трампнинг маъмурияти европалик амалдорлар билан Украина бўйича тинчлик режасига қўшимча ҳужжатларни қўшишни муҳокама қилаётгани ҳақида хабар берилганди. Уларда ЕИ ҳудудида музлатилган Россия активларини ечиш ва уларни АҚШнинг молиявий ва бошқа компанияларига Украинада лойиҳаларни ривожлантириш учун топшириш таклиф қилинган.