Чикагода ҳам “мигрантлар ови” бошланди – ОАВ (видео)

Кеча, 28 сентябрь куни тушдан кейин АҚШнинг Иммиграция ва божхона назорати хизмати (ICE) ходимлари Чикаго марказида бир неча кишини ҳибсга олди. Бу ҳақда ABC7 хабар берди.

Қайд этилишича, шаҳар маркази иммиграция агентлари билан “тўлиб кетган”, шунингдек улар шаҳарнинг бошқа қисмларида ҳам патруллик қилган ва атрофни кўздан кечирган. Ҳатто Чикаго дарёсида ҳам агентликка тегишли қайиқ кузатилган.

ABC7'нинг ёзишича, федерал агентлар норозилик намойишчилари билан тўқнаш келган. Уларнинг айримлари: “ICE, уйга кетинг” дея шиорларини айтган.

Иллинойс губернатори Жей Роберт Прицкер ходимларнинг ҳаракатларини “қўрқитиш” деб атаб, “Америка шаҳарларини милитаризация қилишни” тўхтатишга чақирган.

Чикаго мэри Брэндон Жонсон ҳам баёнот бериб, “ICE агентлари ваҳима уйғотмоқда ва тартибсизлик чиқармоқда”, деган у. Шунингдек, Жонсон уларнинг кўздан ёш оқизувчи газ пуркагичдан фойдаланишда давом этаётгани, одамлар эса ўз ҳуқуқлари доирасида Чикаго яқинидаги иммиграция маркази олдида намойиш ўтказаётганини қўшимча қилган.

Қайд этиш жоиз, жорий йилнинг 27 сентябрь куни АҚШ Президенти Дональд Трамп Орегон штатининг Портленд шаҳрига иммиграция сиёсатига қарши норозиликларни бостириш учун қўшин юборишни буюрганди. У зарур бўлса, “тўлиқ куч”дан фойдаланишга рухсат беришини қўшимча қилган. Трамп қанча ҳарбий юборилишини аниқ айтмаган.

Эслатиб ўтамиз, аввалроқ Дональд Трамп АҚШдаги жиноятчилик билан боғлиқ вазият ҳақида фикр билдириб, Чикагони дунёдаги энг қўрқинчли ва энг хавфли шаҳар деб атаганди.

Жорий йилнинг август ойи бошида эса Трамп тартибни тиклаш учун Вашингтонга Миллий гвардия ходимларини юборган эди. Шунингдек, у жиноятчиликка қарши чоралар доирасида Вашингтон полицияси федерал назоратга ўтказилишини эълон қилган. Трампнинг айтишича, у шаҳарни “илгари ҳеч қачон бўлмагандек хавфсиз ва гўзал” қилмоқчи.