Чирчиқда зарарли дастурларни сотган йигит қўлга олинди

Тошкент вилоятининг Чирчиқ шаҳрида ўзи яратган зарарли APK дастурларни Telegram орқали сотиш билан шуғулланган 21 ёшли йигит қўлга олинди. Бу ҳақда Давлат хавфсизлик хизмати хабар берди. 

Қайд этилишича, у ушбу дастурларни 100-300 минг сўм эвазига Telegram орқали 10 га яқин аккаунт фойдаланувчиларига сотган. Шунингдек, зарарли дастурларни сотиб олган мижозларни техник жиҳатдан қўллаб-қувватлаб, уларга фойдаланиш жараёнида юзага келган муаммолар бўйича маслаҳатлар берган. 

Билдирилишича, ушбу APK дастурлар ёрдамида ўзгаларнинг Telegram мессенжерларидаги аккаунтларига рухсатсиз уланиш, телефонларидаги SMS-хабарларни ўқиш ҳамда тўлов тизимларидаги пул маблағларини ўзлаштириб олиш мумкин. 

Мазкур шахс Telegram мессенжеридаги 5 дан ортиқ гуруҳ ва каналларнинг администратори бўлган. Шунингдек, у каналларда доимий равишда зарарли APK дастурларининг имкониятлари тўғрисида постлар жойлаштириб келган.

Тезкор тадбир давомида гумонланувчидан 1 дона Asus ExpertBook русумли ноутбук, 1 дона Redmi Note 10 Pro русумли телефон, 1 дона қаттиқ диск ва 2 дона банк пластик картаси ашёвий далил сифатида олинган. Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Навоий вилоятида APK файллар тарқатиб, одамларнинг 2 млрд пулини ўмарган шахс ушланган эди.

Шаҳзода Шукуруллаева