Chirchiqda zararli dasturlarni sotgan yigit qo‘lga olindi

Toshkent viloyatining Chirchiq shahrida o‘zi yaratgan zararli APK dasturlarni Telegram orqali sotish bilan shug‘ullangan 21 yoshli yigit qo‘lga olindi. Bu haqda Davlat xavfsizlik xizmati xabar berdi. 

Qayd etilishicha, u ushbu dasturlarni 100-300 ming so‘m evaziga Telegram orqali 10 ga yaqin akkaunt foydalanuvchilariga sotgan. Shuningdek, zararli dasturlarni sotib olgan mijozlarni texnik jihatdan qo‘llab-quvvatlab, ularga foydalanish jarayonida yuzaga kelgan muammolar bo‘yicha maslahatlar bergan. 

Bildirilishicha, ushbu APK dasturlar yordamida o‘zgalarning Telegram messenjerlaridagi akkauntlariga ruxsatsiz ulanish, telefonlaridagi SMS-xabarlarni o‘qish hamda to‘lov tizimlaridagi pul mablag‘larini o‘zlashtirib olish mumkin. 

Mazkur shaxs Telegram messenjeridagi 5 dan ortiq guruh va kanallarning administratori bo‘lgan. Shuningdek, u kanallarda doimiy ravishda zararli APK dasturlarining imkoniyatlari to‘g‘risida postlar joylashtirib kelgan.

Tezkor tadbir davomida gumonlanuvchidan 1 dona Asus ExpertBook rusumli noutbuk, 1 dona Redmi Note 10 Pro rusumli telefon, 1 dona qattiq disk va 2 dona bank plastik kartasi ashyoviy dalil sifatida olingan. Hozirda unga nisbatan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, avvalroq Navoiy viloyatida APK fayllar tarqatib, odamlarning 2 mlrd pulini o‘margan shaxs ushlangan edi.

Shahzoda Shukurullayeva