Данияда янги ҳукумат тузилди

Кеча, 2 июнь куни Дания Бош вазири Метте Фредериксен парламент сайловларидан бир неча ой ўтиб чап-марказчи коалицион ҳукуматни шакллантиришга муваффақ бўлганини эълон қилди. Бу ҳақда “Reuters” хабар берди.

Қайд этилишича, камчилик ҳукуматини тузиш бўйича келишув Фредериксенга кетма-кет учинчи муддатга Бош вазир лавозимини эгаллаш имконини беради. Бу билан март ойидаги сайловлардан сўнг бошланган бир неча ойлик мавҳумликка чек қўйилди. Маълумот ўрнида, ўша сайловлар натижасида Дания парламентидан 12 та партия жой олган эди.

“Мен Аъло ҳазратлари Қирол ҳузурида бўлдим ва узоқ давом этган музокаралардан сўнг ҳукумат шакллантирилиши мумкинлигини маълум қилдим”, дейди Фредериксен.

Ҳам Социал-демократлар, ҳам ўнг либераллар янги ҳукуматга раҳбарлик қилишга интилган икки ойдан ортиқ давом этган музокаралардан сўнг 48 ёшли Фредериксен парламентдаги партиялар томонидан зарур бўлган қўллаб-қувватлашга эришган.

“Бу Данияда яшаётган инсонлар, келажак авлодлар ва шунингдек, ҳайвонлар учун мўлжалланган ҳукумат платформасидир”, дейди у.

Фредериксеннинг сўзларига кўра, ҳукуматнинг умумий устувор йўналишлари бугун, 2 июнь куни тақдим этилади, вазирлар эса эртага, 3 июнь куни тайинланади.

Янги ҳукумат таркибига Социал-демократлардан ташқари Социал-либераллар, “Чап яшиллар” ва марказчи “Мўътадиллар” партияси киради. Улар парламентдаги кўпчиликни таъминлаш учун асосан ўта чапчи “Қизил-яшил альянс”га таянади, шунингдек, алоҳида овоз бериш жараёнларида бошқа партияларнинг ҳам кўмагини излаши мумкин.

Нашрнинг қайд этишича, янги ҳукумат Фредериксеннинг чап қанотга томон бурилганидан далолат беради. Ваҳоланки, у сўнгги тўрт йил давомида чап ва ўнг кучларни – ўзининг Социал-демократлари, “Мўътадиллар” ва Либералларни бирлаштирган ноодатий коалицияга раҳбарлик қилиб келаётган эди.

Эслатиб ўтамиз, Мудофаа вазири Троельс Лунд Поульсен бошчилигидаги ўнг-марказчи кучлар билан музокаралар муваффақиятсиз якунланганидан кейин Фредериксен ҳукуматни шакллантириш учун яна бир бор имкониятга эга бўлган. Ўнг Либераллар партияси етакчиси Поульсендан май ойи бошида Фредериксеннинг коалиция бўйича дастлабки музокаралари муваффақиятсизликка учраганидан сўнг ҳукумат тузиш вариантларини ўрганиб чиқиш сўралган эди. Ўшанда “Мўътадиллар” партияси музокаралардан чиқиб кетганди.