Энди мансабдорларнинг фаолиятини экспертлар баҳолаб боради

Энди Ўзбекистонда мансабдор шахсларнинг фаолиятини баҳолаб борадиган эксперт гуруҳлари тузилади. Бу ҳақда Вазирлар Маҳкамасининг 14 июль куни қабул қилинган “Республика ижро этувчи ҳокимият органлари ҳамда хўжалик бирлашмалари раҳбарлари ва уларнинг ўринбосарлари фаолиятининг энг муҳим самарадорлик кўрсаткичларини ишлаб чиқиш тартибини янада такомиллаштириш тўғрисида”ги қарорида сўз боради. 

Маълум қилинишича, ушбу гуруҳ раҳбарлар ва уларнинг ўринбосарлари фаолиятининг энг муҳим самарадорлик кўрсаткичларини (KPI) ишлаб чиқиш, уларнинг натижаларини таҳлил қилиш ва бажарилмаслик хавфининг олдини олиш бўйича таклифлар тайёрлаш билан шуғулланади. 

Шунингдек, республика ижро этувчи ҳокимият органлари ва хўжалик бирлашмалари томонидан ишлаб чиқилган KPIʼларни давлат илмий марказлари ва бошқа манфаатдор ташкилотлар ходимларини жалб этган ҳолда экспертизадан ўтказиш тартиби жорий этилади.
Республика ижро этувчи ҳокимият органлари ва хўжалик бирлашмаларида жамоатчилик асосида эксперт гуруҳлари тузилади.

Эксперт гуруҳларининг асосий вазифалари қуйидагича белгиланди:

• “Ўзбекистон – 2030” стратегиясида кўзда тутилган мақсадлар ва давлат дастурларига мувофиқлигини ва боғлиқлигини, шунингдек, уларнинг соҳадаги мавжуд тизимли муаммоларни бартараф этишга йўналтирилганлигини ва молиялаштириш манбаларини аниқлашни ҳисобга олган ҳолда KPI кўрсаткичларини ишлаб чиқиш;
• KPI кўрсаткичлари бажарилишини доимий назорат қилиш, уларнинг бажарилмаслик хавфини олдини олиш бўйича таклифлар ишлаб чиқиш;
• KPI кўрсаткичларини ишлаб чиқишда уларнинг бюджет маблағларидан фойдаланишнинг мақсадли кўрсаткичларига мослигини инобатга олиш, шунингдек, KPI кўрсаткичлари бажарилиши натижаларини мунтазам равишда таҳлил қилиб бориш.