Эрон АҚШнинг зарбасидан кейин базаларни бульдозерлар билан тикламоқда – ОАВ

АҚШ ва Исроилнинг қимматбаҳо ракета зарбаларидан сўнг Эрон ерости ракета базаларига кириш йўлларини оддий қурилиш техникалари ёрдамида қайта очишга муваффақ бўлди. Бу ҳақда CNN хабар берди.

Телеканал маълумотига кўра, АҚШ ва Исроил зарбалари нишонга олган 69 та туннель кириш жойидан 50 таси аллақачон қайта очилган. Бунинг учун Эрон асосан бульдозер ва юк машиналаридан фойдаланган.

Нашр маълумотларига кўра, Эрон ҳозир узоқ масофага учувчи кўплаб ракеталарни парвоз қилдириш имконини берадиган даражада ерости арсеналларини қайта ишга туширган. Ҳарбий ҳаракатлар давомида ҳам, АҚШ ва Исроилнинг қурилиш техникаларига берган зарбаларига қарамай, туннель кириш жойларини қазиш ишлари тўхтамаган.

Экспертларнинг фикрича, бу ҳолат АҚШ ва Исроил стратегиясининг чекланган имкониятларини кўрсатади. Уларнинг айтишича, фақат туннель киришларини нишонга олиш орқали Эроннинг ракета салоҳиятини бутунлай йўқ қилишнинг имкони йўқ.

Қолаверса, Эрон бомбардимонлар оқибатида шикастланган ҳарбий объектлар атрофидаги йўлларни ҳам тиклаган. Сунъий йўлдош тасвирларида кўплаб кратерлар кўмилгани, айрим йўл участкалари эса тўлиқ таъмирлангани кўринади.

АҚШ Мудофаа вазири Пит Ҳегсет аввалроқ Эрон қолган ракета қурилмалари ва ракеталарни қазиб олиши мумкинлигини, бироқ уларни алмаштириш имконияти йўқлигини айтган эди.

Шунингдек, АҚШ Мудофаа вазирлиги май ойида Эрон билан уруш учун 25 миллиард доллар сарфланганини маълум қилган. Бироқ айрим америкалик расмийлар ҳақиқий харажатлар 50 миллиард долларга етган бўлиши мумкинлигини билдирган. “Financial Times” нашри эса АҚШнинг Эронга қарши ҳарбий кампанияси Вашингтонга ҳар куни юзлаб миллион долларга тушганини ёзган.

Эслатиб ўтамиз, аввалроқ АҚШ Президенти Дональд Трамп “Fox News” телеканалига берган интервьюсида Эрон ядро қуролидан воз кечишга розилик бергани ҳақида хабар берилганди.