Эрон Қувайтдаги АҚШ базасига ҳужум қилди. 15 америкалик ҳарбий яраланди

Жорий йилнинг 5 апрель куни тунда Қувайтдаги Али ал-Салом авиабазасига Эрон дрони ҳужум қилиши ортидан 15 нафар америкалик ҳарбий яраланди. Бу ҳақда CBS News хабар берди.

“Эроннинг Қувайтдаги авиабазага ҳужуми ортидан 15 америкалик яраланди”, дейилади хабарда.

Манбалардан бирининг айтишича, жабрланганларнинг аксарияти аллақачон ўз хизмат вазифаларига қайтган.

АҚШ Марказий қўмондонлиги маълумотларига кўра, 6 апрель ҳолатида Эронга қарши операция давомида жароҳатланган америкалик ҳарбийлар сони 373 нафарга етган. Шундан қарийб 330 нафари хизматга қайтган, 5 нафарининг аҳволи оғир деб баҳоланмоқда.

28 февраль куни АҚШ ва Исроил биргаликда Эронга қарши ҳарбий операцияни бошлаган эди. Бунга жавобан Теҳрон бир қатор чоралар кўрди, жумладан Исроил ва Яқин Шарқдаги АҚШ базаларига ракета ва дрон зарбалари берди. Бу базалар Саудия Арабистони, Баҳрайн, Қатар, Қувайт ва БАА ҳудудларида жойлашган.

Эслатиб ўтамиз, аввалроқ АҚШ Президенти Дональд Трамп Эронга Ҳормуз бўғозини очиш бўйича қўйилган ультиматум муддати тугаб бораётганини маълум қилганди. У Эрон расмийларини қўрқитиб, агар бўғоз очилмаса, мамлакат устида “дўзах” ёғилишини иддао қилганди. Теҳрон эса бу талабни рад этиб, АҚШ Президентининг ўзини “жаҳаннам қаърига юбориш” билан таҳдид қилганди. Шундан сўнг, яна Трамп Ҳормуз бўғози очилмаса, Эрондаги электр станциялари ва кўприкларни бир кунда вайрон қилиш билан таҳдид қилганди.