Эрон пойтахти кўчирилмайдиган бўлди

Эрон ҳукумати Теҳрондан пойтахтни кўчириш масаласини кун тартибидан олиб ташлади. Сув танқислигини ҳал қилиш учун Форс кўрфазидан сувни Теҳронга ҳайдаш лойиҳаси амалга оширилади. Бу ҳақда Президентнинг денгиз ресурсларини бошқариш бўйича вакили Али Абдулализода маълум қилди.

Унинг сўзларига кўра, якуний режа – пойтахтдаги сув ва экологик муаммоларни янги технологиялар ва ресурсларни самарали бошқариш орқали Теҳроннинг ўзида ҳал этишдан иборат.

Абдулализода, шунингдек, Форс кўрфазидан Теҳронга сув узатиш лойиҳаси минг километр узунликда бўлиб, у эронлик мутахассислар томонидан тўлиқ якунлангани ва ҳозирда Теҳрон учун ягона ишончли ичимлик суви манбаи сифатида кўрилаётганини таъкидлаган.

Теҳронда камида бешта йирик сув омбори мавжуд бўлиб, улар орқали шаҳар ичимлик суви билан таъминланади. Аммо буларнинг барчаси абгор ҳолатга келиб қолган. Шу сабабли 9 ноябрдан бошлаб кечаси сув босими пасайтирилган.

Омборлардаги сув захираларининг камайиши бу йил кузатилган сўнгги 60 йилдаги энг кучли қурғоқчилик ва иссиқ тўлқинлар билан боғлиқ. Шу билан бирга, мутахассисларнинг фикрича, бу инқирознинг асл сабаби – сув ресурсларини самарасиз бошқариш ва қишлоқ хўжалиги соҳасидаги суст ислоҳотлардир.

Эслатиб ўтамиз, аввалроқ Эрон Президенти Масъуд Пезешкиён Теҳрон аҳолиси эвакуация қилиниши ва пойтахтни Форс кўрфази соҳилига кўчириш эҳтимоли борлигини айтган эди.