Файзуллаевга “Бенфика” ва яна 30 дан ортиқ клубдан таклиф бўлгани очиқланди

Ўзбекистон миллий терма жамоаси яримҳимоячиси Аббосбек Файзуллаев Россиянинг ЦСКА клубидан Лиссабоннинг “Бенфика” клубига ўтиши мумкин бўлган, бироқ португалияликлар сиёсий сабаблар туфайли трансфердан воз кечган. Бу ҳақда футболчининг агенти Герман Ткаченко маълум қилди.

“Қарийб бир йил олдин биз Файзуллаевни сотиб олиши мумкин бўлган ва Аббоснинг ўзи ҳам ўтишга тайёр бўлган кўплаб клублар билан гаплашдик ва учрашдик. Рўйхатда ўттиздан ортиқ клуб бор эди. “Бенфика” эса бизга трансфер имконсизлигини билдирди. Эҳтимол, улар Аббоснинг ўзбек эканини тушунмаган, чунки уларнинг жавобида жамоада украиналик футболчиларнинг мавжудлиги тилга олинган эди. Ёки улар бошиданоқ Россия клублари билан ҳамкорлик қилишга тақиқ борлигини билган бўлишлари мумкин”, дейди Ткаченко.

Маълумот учун, Файзуллаев ЦСКА сафида 2023 йилнинг июлидан 2025 йилнинг ёзигача тўп сурди. “Қизил-кўклар” таркибида у 72 та ўйинда майдонга тушиб, 8 та гол урди ва 22 та голли узатмани амалга оширди. Аббосбек “армиячилар” билан бирга Россия Кубоги ва Суперкубогини қўлга киритди ҳамда РПЛда бронза медалларига сазовор бўлди.

Ҳозирда Аббосбек Файзуллаев Туркиянинг “Истанбул Башакшеҳир” клубида ўйнамоқда. Қайд этиш жоиз, айни дамда бошқа бир ўзбекистонлик футболчи Элдор Шомуродов ҳам “Башакшеҳир” жамоаси аъзоси ҳисобланади.