Филиппинда тайфун оқибатида олти киши ҳалок бўлди

Филиппинда 200 дан ортиқ одамнинг ҳаётига зомин бўлган тўфондан бир неча кун ўтиб мамлакатга “Фунг-Вонг” супер тўфони ёпирилди ва оқибатда камида олти киши ҳалок бўлди. Бу ҳақда BBC хабар берди.

Қайд этилишича, “Фунг-Вонг” супер тўфони тошқин ва кўчкиларни олиб келиб, кўпчиликнинг ўлимига сабаб бўлган. Тўфон оқибатида бутун вилоятлар бўйлаб электр энергияси узилган. Кейинчалик у кучсизланиб, тайфунга айланган.

Кўплаб аҳоли ҳали ҳам кетма-кет табиий офатлардан қутулиш учун курашаётган бир пайтда “Фунг-Вонг” тўфони бу йил Жануби-Шарқий Осиё давлатида содир бўлган 21 тўфонга айланган. Филиппинда тўфон олдидан 1,4 миллиондан ортиқ одам эвакуация қилинган. Тўфон эса ҳозир 3000 нафардан ортиқ одам эвакуация қилинган Тайванга йўл олган. 

Жорий йилнинг 9 ноябрь куни, маҳаллий тилда Увань номи билан танилган “Фунг-Вонг” 185 км/соат ва 230 км/соат шамоллар билан Аурора провинциясига урилган. Шамол тезлиги Филиппин тарихидаги энг кучли бўронлар билан тенглашмаган бўлса-да, “Фунг-Вонг” мамлакатга кўп миқдорда ёмғир ёғдирган ва 4100 га яқин уйни бутунлай вайрон қилган.

Кабанатуан шаҳрида яшовчи Мерcидита Адриано ва унинг оиласи ўтган ҳафта бўронга тайёргарлик кўриш учун уйлари яқинидаги дарахтларни кесишган. Бугун, 11 ноябрь куни эрталаб сув сатҳи пасайган бўлса-да, мамлакатнинг катта қисми ҳали ҳам сув остида. 

Эслатиб ўтамиз, марказий ва жанубий Филиппин оролларига ёпирилган “Калмаэги” тайфуни оқибатида камида 140 киши ҳалок бўлганди, яна 127 нафар инсон бедарак йўқолган эди.

Моҳичеҳра Қадамова