Араб мамлакатлари Трампни Эронга ҳужум қилмасликка чақирди 

Форс кўрфази давлатлари 2025 йилнинг декабрь ойи охиридан бери Эронда давом этаётган намойишларга деярли муносабат билдирмаган эди. Кеча, 13 январь куни Саудия Арабистони, Уммон ва Қатар АҚШ маъмуриятини Эронга зарба беришдан тийилишни сўраб, огоҳлантирди. Бу ҳақда “The Wall Street Journal” хабар берди.

Нашрнинг ёзишича, Форс кўрфази давлатлари Эрон ичидаги норозилик намойишлари ҳақида очиқ баёнот беришдан қочиб келмоқда. Манбаларга кўра, Саудия Арабистони, Уммон ва Қатар Оқ уйга мурожаат қилиб, Эрондаги амалдаги тузумни ағдаришга уриниш глобал нефть бозорини издан чиқариши ва охир-оқибат АҚШ иқтисодиётига зарар етказиши мумкинлигини билдирган. 

Оқ уй расмийси эса Трамп бу огоҳлантиришларни инобатга олмаслиги мумкинлигини айтган.

“Президент ҳар қандай масалада турли фикрларни эшитади, бироқ якунда ўзи энг тўғри деб билган қарорни қабул қилади”, деган у. 

Кеча, 13 январь куни АҚШ раҳбари Дональд Трамп ўзининг Truth Social ижтимоий тармоғида Эронга “ёрдам йўлда” эканини айтиб, эронликларни Ислом Республикаси режимига қарши намойишларни давом эттиришга чақирган. 

“Эронлик ватанпарварлар, норозилик намойишларини давом эттиринг — давлат институтларини ўз назоратингизга олинг! Қотиллар ва зўравонларнинг исмларини қайд қилиб боринг,  улар қаттиқ жазоланади. Намойишчиларнинг ўлдирилиши тўхтамагунча, Эрон расмийлари билан барча учрашувларни бекор қилдим. Ёрдам йўлда”, деган Трамп ўз постида.

Бу баёнот Трамп маъмурияти Эронга нисбатан қандай чоралар кўриш масаласини муҳокама қилиш учун юқори мартабали расмийлар йиғилишини ўтказиши кутилаётган бир пайтда янграган.

Эслатиб ўтамиз, аввалроқ Трамп Эрон билан ҳамкорлик қилаётганларга 25 фоизлик бож жорий қилиши ҳақида хабар берилганди.