Франция Жаҳон чемпионати чипта нархларидан норозилигини билдирди

Франция футбол мухлислари уюшмалари FIFA томонидан 2026 йилги Жаҳон чемпионати ўйинлари учун белгиланган чипта нархларидан кескин норозилик билдирмоқда. Бу ҳақда “franceguyane” нашри хабар берди.

Маълумотларга кўра, Франция терма жамоасининг Сенегалга қарши илк учрашуви учун энг арзон чипталар қарийб 200 евро, финал учрашуви учун эса 3600 еврогача баҳоланмоқда.

Кўплаб мухлислар бундай нархлар уларни футбол байрамидан четлаштираётганини ва FIFA томонидан жорий этилган янги нархлаш тизими “футболнинг ўлими” эканини таъкидлашмоқда.

“Les Baroudeurs” мухлислари ассоциацияси вице-президенти Меҳди Салем вазиятни 2018 йилда Россияда бўлиб ўтган Жаҳон чемпионати билан таққослади. Унинг сўзларига кўра, ўша турнирда финал ўйини чипталари тахминан 500 евро, 2022 йилда Қатарда эса 600 евро атрофида бўлган. Эндиликда эса ушбу нархнинг 3600 еврога чиқиши мутлақо асоссиз, дея баҳоланмоқда.

Шунингдек, у ёш мухлисларнинг Жаҳон чемпионати муҳитини ҳис қилиш имконидан маҳрум бўлаётганидан афсус билдирди:

“2018 йилда бошдан кечирган ҳис-туйғуларимиз атрофимиздаги одамларнинг кўз ёшлари, ёмғир остида чемпионликни нишонлаш булар унутилмас лаҳзалар эди. Бу менинг орзуйим эди ва мен уни рўёбга чиқардим. Энди эса ассоциациямиздаги 19-20 ёшли йигитлар бундай имкониятдан маҳрум бўлаётгани жуда ачинарли”,  дейди Меҳди Салем.

Эслатиб ўтамиз, аввалроқ Европа футбол мухлислари ассоциацияси (EFSA) FIFA томонидан 2026 йилги Жаҳон чемпионати учун белгиланган юқори чипта нархларидан норозилик билдирган эди.