Франциялик футболчи уч йиллик қамоқ жазосига ҳукм қилинди

Франциялик ҳимоячи Филипп Ланкетин 2023 йил октябрь ойида Франциянинг А1 автомагистралида содир этган аянчли автоҳалокати учун уч йиллик қамоқ жазосига ҳукм қилинди. Бу ҳақда “Voetbalprimeur” нашри хабар берди.

Нидерландиянинг “АДО Ден Хааг” жамоасида тўп сурган 20 ёшли футболчи беихтиёр оғирлаштирилган тан жароҳати етказиш ҳамда лицензия ва суғуртасиз автомобиль бошқариш айблари бўйича суд томонидан икки йили шартли тарзда уч йилга озодликдан маҳрум қилинди. Шунингдек, у беш йилга ҳайдовчилик ҳуқуқидан маҳрум этилди ва жабрланувчиларга моддий товон пули тўлаши белгиланди.

Воқеа 2023 йил 9 октябрда содир бўлган. Ланкетин ота-онасига тегишли автомобилни дўсти билан ҳайдаб кетаётганида Париждан 50 км узоқликдаги Ле-Фель шаҳри яқинида соатига 140 км тезликда бошқа машинага урилган. Кучли зарба оқибатида машина қарама-қарши йўлга чиқиб кетган ва яна бир тўқнашув юзага келган.

Маълумотларга кўра, воқеа оқибатида жабрланган автомобиль ҳайдовчиси Фарид Баҳо оғир квадриплегияга  (орқа мия ёки асаб тизимининг шикастланиши натижасида юзага келадиган фалажлик) учраган ва энди у умрининг охиригача ногиронлар аравачасида қолиши мумкин.

Компьень Олий судида футболчи ҳайдовчилик гувоҳномасисиз машина ҳайдаганини тан олди. Тергов натижасига кўра, воқеа вақтида 18 ёшда бўлган Ланкетин қонида 0,30 г/л миқдорда алкоголь аниқланган ва наркотик (наша) тести ижобий чиққан.

Ушбу ҳолатдан сўнг Нидерландиянинг “АДО Ден Хааг” клуби расмий баёнотида 2023 йилда Францияда содир бўлган воқеа бўйича сўнгги маълумотлардан сўнг Филипп Ланкетинни вақтинча четлатгани ва унинг ижаравий шартномаси бекор қилиниши маълум қилинди. Клуб футболчини таркибга қўшишдан аввал бу иш бўйича маълумотга эга бўлмаганини билдирган.

Эслатиб ўтамиз, аввалроқ Норвегия терма жамоаси ҳужумчиси Андреас Шельдеруп ноқонуний видеони тарқатгани учун Дания суди икки ҳафталик шартли қамоқ жазосига ҳукм қилган эди.