Ғазода оммавий очарчилик режали ва тизимли тарзда яратилмоқда – UNRWA

Исроил блокадаси ва ҳужумлари остида бўлган Ғазо секторидаги оммавий очарчилик “режалаштирилган ва тизимли”. Бу ҳақда Бирлашган Миллатлар Ташкилотининг Фаластинлик қочқинларга ёрдам кўрсатиш агентлиги (UNRWA) маълум қилди.

“Ғазо секторида оммавий очарчилик режали ва тизимли равишда жорий этилмоқда. Бугун кўпроқ болалар ҳалок бўлди, уларнинг танаси очликдан озиб кетди”, дейилади баёнотда.

Баёнотда, Америка Қўшма Штатлари ва Исроил томонидан бошқариладиган “Ғазо Гуманитар Ёрдам Жамғармаси” деб аталмиш ёрдам тарқатиш механизмининг инсонпарварлик инқирозини ҳал қилиш ўрнига ҳарбий ва сиёсий мақсадларга хизмат қилгани таъкидланди. UNRWA ушбу механизмни гуманитар инқирозни ҳал қилишга қаратилган эмас, балки кўпроқ қурбонларга олиб келадиган шафқатсиз амалиёт деб атади.

UNRWA Исроил ушбу механизм орқали Ғазо ташқарисидан ва ичидан барча инсонпарварлик ёрдамлари оқимини тўлиқ назорат қилишини таъкидлади. 27 майдан буён Ғазода “Ғазо гуманитар ёрдам жамғармаси” деб аталган ёрдам тарқатиш пунктларига уюштирилган тизимли ҳужумлар оқибатида 1083 нафар фаластинлик ҳалок бўлди, 7275 нафари яраланди.

Исроил ҳужумлари ва гуманитар ёрдам оқимини чекловчи қаттиқ блокада остидаги Ғазо сектори кенг тарқалган очлик, сув ва гигиена воситалари етишмаслиги билан тавсифланган гуманитар фалокатни бошдан кечирмоқда. Ғазо секторида очликдан ўлганлар сони кундан-кунга ортиб бормоқда, айниқса болалар ўртасида. Маҳаллий ва халқаро доиралар Исроил “очлик ва ташналикдан қурол сифатида” фойдаланаётганини айтади.