Германияда дрон сабаб рейслар қолдирилди

Германиянинг Берлин-Бранденбург аэропорти яқинида дрон ҳаракатланганидан кейин рейслар вақтинча тўхтатилди. Бу ҳақда “Deutsche Welle” хабар берди.

Маълумотларга кўра, кеча, 31 октябрь куни кечқурун аэропорт яқинида дрон пайдо бўлган. Полиция ҳам дронни пайқаган, бироқ дрон қайси давлатга тегишли экани аниқланмаган. Шундан сўнг, рейслар бошқа аэропортларга йўналтирилган ва баъзилари маҳаллий вақт билан соат 20:08 ва 21:58 оралиғида кечиктирилган.  

Қайд этилишича, Базель, Осло ва Барселонага парвозлар кечиктирилган. Лондон, Бирмингем, Манчестер, Хельсинки  ва Анталиядан келаётган  самолётлар бошқа аэропортларга йўналтирилган.

“Кейинроқ полиция ходимлари дронни пайқаган. Бироқ уни топа олмаган. Аэропорт яқинига полиция вертолёти жойлаштирилган. Қидирув операциясига Германия Федерал Авиация идораси ҳам қўшилган”, дея қўшимча қилинади хабарда.

Эслатиб ўтамиз, аввалроқ Германиянинг Мюнхен аэропортида ҳаво ҳудуди яқинида бир неча дрон кўриниши сабабли парвозлар бошланиши кечиктирилган эди.

Бунёд Келдибоев