Германияда намойишчилар депутатни калтаклади (видео)

Бугун, 29 ноябрь куни Германиянинг Гисен шаҳрида янги ёшлар ташкилоти қурултойига келган “Германия учун альтернатива” (AdG) партиясидан Бундестаг депутати Юлиан Шмидт калтакланди. Бу ҳақда партия ҳамраиси Алиса Вайдель маълум қилди.

“Бизнинг бир депутатимиз жароҳат олди. Бугун Бундестаг депутати Юлиан Шмидтни калтаклашди”, деган у тадбирнининг очилиш маросимида.

Вайдель қурултойга қарши намойиш уюштирган Германия касаба уюшмалари бирлашмаси, “Ўнгчиларга қарши бувилар” ҳаракати, антифашист фаолларга, шунингдек партиянинг сиёсий рақибларига мурожаат қилган. 

“Қуролланишни бас қилинг! Сиёсат ва парламент зиддиятларининг жойи кўчалар эмас. Бу парламентларда, далиллар алмашинадиган жойда бўлиши керак”, дейди у.

Шмидтнинг айтишича, AdG фаолиятидан норозилар унга конгресс ўтаётган залдан тахминан 800 метр узоқликда ҳужум қилган.

“Биз машинани қўйиб, зал томон юраётгандик. Тўсатдан олдимизда бир гуруҳ эркаклар пайдо бўлди. Биз уларнинг ёнидан ўтиб кетмоқчи бўлдик, лекин улар менга мушт тушира бошлади. Ўзимни ҳимоя қилишга ҳаракат қилдим”, дейди депутат.

Шмидтнинг айтишича, ҳужумчилар унинг депутат эканини билган-билмагани аниқ эмас.

“Улар мендан исмимни сўрашмади, шунчаки уришни бошлашди. Кейин фельдшерга мурожаат қилдим. У бурним синиб кетган бўлиши мумкинлигини айтди”, дея қўшимча қилган Шмидт.

Маълумот учун, бугун, 29 ноябрь куни Гисен шаҳрида тахминан 20 минг киши қуролтойга қарши намойишга тўпланган. Норозилар полициячиларга бутилка ва тош улоқтирган, тадбир ўтаётган ҳудуд томон қўшин сафини ёриб ўтишга уринган. Ҳуқуқ-тартибот ходимлари таёқлар ва сув пуркагичлардан фойдаланишга мажбур бўлган. Бир неча киши жароҳатланган.

Эслатиб ўтамиз, аввалроқ суд Словакия Бош вазири Роберт Фицога суиқасд уюштиришга уринган ёзувчи Юрай Цинтулани 21 йиллик қамоқ жазосига ҳукм қилганди.