“Гитлер” 15 суткага қамалиши мумкин

Россиянинг Свердловск вилоятидаги Нижний Тагил шаҳрида пицца буюртмасини “Адольф Гитлер” номи билан расмийлаштирган талаба полиция томонидан ушланди. Бу ҳақда РИА Новости хабар берди.

Маҳаллий полиция маълумотига кўра, йигит шаҳардаги савдо марказларидан бирида пицца сотиб олиш учун буюртма берган ва ўзини “Адольф Гитлер” деб таништирган. Ҳодисадан сўнг полиция ва экстремизмга қарши курашиш бўлинмаси ходимлари буюртма берган шахсни аниқлаб, қўлга олган.

Маълум бўлишича, Тимофей исмли гумонланувчи – Қурилиш коллежи талабаси таълим муассасасининг ўзида ушланган. Полиция вакилларининг билдиришича, талаба қўлга олинганидан сўнг қилган ишидан пушаймон бўлган, кўз ёшларини тийиб тура олмаган ҳолда узр сўраган. У ўзининг нацист эмаслиги ва бундай ғояларни қўллаб-қувватламаслигини айтган.

Тимофей бу ҳаракатининг маъносини тўлиқ англамаганини билдирган. Шунга қарамай, унга нисбатан фашизмни тарғиб қилиш бўйича маъмурий иш очилган. Агар айби тасдиқланса, унга 15 суткагача маъмурий қамоқ жазоси тайинланиши мумкин.

Шунингдек, полиция раҳбарияти коллеж директори номига расмий тақдимнома киритиб, талабалар ўртасида ватанпарварлик тарбияси ва профилактик тушунтириш ишларини кучайтиришни талаб қилиши маълум қилинган.

Эслатиб ўтамиз, аввалроқ “Бин Лодин” Туркманистондаги қамоқхонада вафот этгани хабар қилинганди.