Глобал олтин инқирози бошланмоқда. Ер остида 38 фоиз захира қолди – WGC

Инсоният тарихида қазиб олинган жами 216 минг 265 тонна олтиннинг умумий қиймати 29 триллион АҚШ долларга етди. Ер остида қолган захиралар эса 40 йилдан камроқ муддатга етиши мумкин. Бу ҳақда Жаҳон олтин кенгаши (WGC) хабар берди. 

Кенгаш ҳисоботига кўра, инсоният минг йиллар давомида қазиб олган олтиннинг қарийб учдан икки қисми 1950 йилдан кейинги замонавий технологиялар даврига тўғри келади. Энг катта улуш 45 фоиз кўрсатгич билан заргарлик саноатига тўғри келади. Бу шуни англатадики, 29 триллион долларлик бойликнинг деярли ярми шахсий тақинчоқлар кўринишига айланиб улгурган. Дунё Марказий банкларида 37 минг 755 тонна олтин сақланади.

Агар барча қазиб олинган 216 минг 265 тонна олтин йиғилса, АҚШдаги Оқ уйнинг катталигига тенг бўлади. Ер остида қолган, ҳали қазиб олинмаган захиралар 132 минг 110 тонна деб баҳоланган. Ҳозирги кунда йилига 3 минг 661 тонна олтин қазиб олиниши инобатга олинса, инсониятга маълум захираларнинг фақат 38 фоизи қолган. Бу эса дунё глобал “олтин танқислиги” даврига яқинлашаётганини англатади.

Қайд этилишича, геосиёсий таранглик ва АҚШ доллари заифлашиши сабабли олтин нархи 2025 йил бошидан буён 50 фоиздан зиёдроққа ошган. Октябрь ойида эса рекорд даражага етиб, 4 минг 380 АҚШ долларини ташкил этган.

Эслатиб ўтамиз, аввалроқ Эроннинг энг йирик конларидан бири – Хуросон провинциясидаги Шодан олтин конида қарийб 61 миллион тонналик олтин захираси топилганди.

Нигора Махаммадиева