Гутерриш Трампга қарши “саботаж” бўйича текширув ўтказишни буюрди

БМТ Бош котиби Антониу Гутерриш БМТ Бош Ассамблеясида АҚШ Президенти Дональд Трампга қарши юз берган “саботаж” бўйича текширув ўтказишни буюрди. Бу ҳақда CNBC хабар берди.

Телаканалга кўра, Дональд Трамп БМТдан у билан Бош Ассамблея сессияси давомида содир бўлган “учта сирли воқеа”ни текширишни талаб қилган. Уларга эскалаторнинг тўхтаб қолиши, телесуфлёрнинг ўчиши ва нутқи чоғида товушнинг узилиши киради.

Манбага кўра, БМТ Бош котибининг вакили Стефан Дюжаррик ушбу ҳодисаларни тергов қилиш бўйича кўрсатма берган.

“Бугун кечқурун БМТ Бош котиби АҚШнинг БМТдаги доимий ваколатхонасидан жорий йилнинг 23 сентябрь куни Президент Трампнинг БМТ қароргоҳига ташрифи вақтида содир бўлган воқеалар юзасидан мурожаат олди. Бош котиб аллақачон батафсил текширув ўтказишни буюрганини билдирди”, дейди у.

Маълумот учун, жорий йилнинг 23 сентябрь куни Дональд Трамп БМТ Бош Ассамблеясида нутқ сўзлаш учун қароргоҳ биносига кўтарилаётганида эскалатор тўхтаб қолган. Оқ уй эса агар эскалатор атайлаб тўхтатилган бўлса, айбдорларни ишдан бўшатишга чақирган.

Эслатиб ўтамиз, аввалроқ Дональд Трамп БМТ Бош Ассамблеясида нутқ сўзлаш учун минбарга чиққан пайтда телесуфлёр ишламай қолгани ва Трамп бунга масъул шахс “катта муаммога дуч келишини” айтганди.