Иньеста Африка жамоасини бошқариши мумкин

“Барселона” ва Испания терма жамоасининг собиқ ярим ҳимоячиси Андрес Иньеста Марокаш Қироллик футбол федерацияси (FRMF)нинг эътибор марказига тушди. Федерация Иньестанинг Марокаш терма жамоаси мураббийлар штабига қўшиш ҳақида жиддий ўйламоқда. Бу ҳақда “Mundo Deportivo” нашри хабар берди.

Манбага кўра, 41 ёшли испаниялик мутахассис Марокаш ва Сенегал ўртасидаги Африка кубоги финал учрашувини томоша қилиш учун Работ шаҳрига таклиф этилган. 

Маълум қилинишича, Иньеста яқинда мураббийлик фаолиятига тайёргарлик кўришни бошлаган ва шу билан бирга элита футбол олами билан яқин алоқада бўлиш истагини билдирган. У келажакда бош мураббий ёки спорт менежменти йўналишида фаолият юритишни режалаштирмоқда.

Қайд этиш жоиз, Марокаш Испания ва Португалия билан биргаликда 2030 йилги Жаҳон чемпионатига мезбонлик қилади. Шу сабабли мамлакат футбол раҳбарияти узоқ муддатли ва йирик футбол лойиҳаларини амалга оширишни кўзламоқда.