Instagram’да ўсмирларнинг рухсатсиз жонли эфирга чиқиши тақиқланди

Эндиликда 16 ёшгача бўлган фойдаланувчилар Instagram’да онлайн жонли эфирни бошлашдан олдин ота-онасининг рухсатини олишлари талаб этилади. Бу ҳақда Instagram’га эгалик қилувчи Meta компанияси хабар берди.

Қайд этилишича, компания Instagram’даги ўсмирлар аккаунтлари учун янги хавфсизлик функцияларини жорий этмоқда. Хусусан, эндиликда 16 ёшгача бўлган фойдаланувчилар онлайн жонли эфирни бошлашдан олдин ота-онасининг рухсатини олиши талаб этилади. Шунингдек, илова энди ўсмир фойдаланувчиларга ота-онасининг розилигисиз “яланғочликдан ҳимоя” функциясини ўчириб қўйишга ҳам рухсат бермайди. Ушбу функция шубҳали тасвирларни хиралаштириб кўрсатади.

Бундан ташқари, Meta Facebook ва Messenger'да “ўсмирлар учун аккаунтлар”ни жорий этаётганини эълон қилди. Instagram’даги каби ёш бўйича мос фойдаланувчилар автоматик тарзда янги турдаги аккаунтларга ўтказилади. Бундай аккаунтлар ота-она назоратининг мажбурий функциялари ва аккаунт эгаси кимлар билан мулоқот қилиши ва ўзаро алоқада бўлиши мумкинлигига доир чекловларни ўз ичига олади.

Маълумот учун, ўтган йилнинг кузида Meta Instagram учун “ўсмирлар аккаунтлари”ни жорий қилган эди. Натижада платформадаги ёш бўйича мос келадиган 54 миллиондан ортиқ фойдаланувчининг аккаунтлари янада ёпиқ шаклга ўтказилган. Instagram’да бу қоида 13 ёшдан 15 ёшгача бўлган фойдаланувчиларга тааллуқли. Facebook ва Messenger фойдаланувчиларининг аккаунтлари ҳам худди шундай тарзда ишлайди. Ўсмирлар ота-онасининг розилигисиз нотаниш одамлар билан мулоқот қила олмайди ёки айрим махфийлик созламаларини мустақил равишда ўзгартира олмайди. Шу билан бирга, ота-оналар фарзандларининг ижтимоий тармоқларда ўтказган вақти ҳамда дўстлар рўйхатини назорат қила олади.